Aston Villa chhandamtu Benteke
Premier League hmawr an bawk hnai a, champion inum inkhel, Champions League khelh phak tum inkhel bakah 'tlak hlau' inkhel hmuhnawm tak tak hmuh tur a awm leh ta. Thawhlehni zan khan 'tlak hlau' inkhelah Aston Villa leh Queen Park Rangers chu 3-3 in an inhnehtawk.
Villa Park-a inkhelah hian QPR in vawi hnih lai hma hruai hmasa zawk mah se Belgian striker Christian Benteke chet ṭhat zan an nang hlauh a, kum 24-a upa Villa striker hian hat-trick siamin a team a chhandam a ni.
Inkhel chu
Inkhel ṭan tir lamah boruak a dul viau dawn emaw tih laiin mikhual team QPR an lo lang zawk a, Villa goal an nawr vawikhatnaah goal an khung nghal. Bobby Zamora ball cross ṭha tak chu Matt Phillips chuan minute sarih na lekah an hmahruaina turin a lo khung a ni.
Aston Villa in an khelmualah si phurh rei an tum lo, minute thum a liam hman chauh tihin Benteke chuan Villa si phurh sutna goal a rawn khung a, Fabian Delph siam sak a ni. Villa an khelh ṭha chhunzawm a, minute 33 na lekah Benteke bawk a rawn lang leh a, Belgian striker hian Gabriel Agbonlahor ball siamsak chu Villa hmahruai nan a khung. Goal dang luhbelh tawh lo in chawlh lawk an hmang a, Villa in 2-1 in hma an hruai.
Second half-ah Villa bawkin chance an nei hmasa zawk a, mahse Villa tana a game tluan hmasa ber kheltu kum 19-a upa Jack Grealish chuan a chance neih a chhawr ṭangkai thei tlat lo. Minute 55 naah QPR in an si phurh sutna goal an rawn khung a, kum 36-a upa defender Clint Hill chuan a Premier League goal hmasa ber a khung. QPR an phur tulh tulh a, minute 78 naah QPR striker che ṭha em em mai Charlie Austin chuan tun season-a a goal 17 na tur rawn khungin a team QPR chu 3-2 in hma a hruai pui.
QPR in khualmualah point thum an hlawhchhuak tawh mai dawn emaw tih hnuah Benteke-a'n a zia rawn chhuah lehin minute 83 naah Villa tan goal pawimawh a rawn khung a, 3-3 in inkhel an ṭin ta a ni.
Eng nge an sawi?
Aston Villa manager Tim Sherwood chuan, "Chak zawk nih kan phu a, kan inkhel entute chuan chak kan phu tih an hre vek ang. Game thununtu zawk nichunga chak loh hi a na ber chu a ni. Players inhliam nei ṭeuh chunga kan khel ṭha kha a lawmawm ber chu a ni. QPR kha an vannei a, goal shot tlemte chauh neichungin goal thum an rawn khung thei a ni, " a ti.
QPR manager Chris Ramsey chuan, " Dik taka sawi chuan point khat chauh kan hlawhchhuak khan minti lawm lo hle. Mahse, tunhnai kan game pahnihah point li kan hlawhchhuak thei a, result duhawm tak a ni tho e," a ti.