Real-in Sterling kan enthla - Zidane

France leh Real Madrid player ropui Zinedine Zidane chuan Liverpool rawlthar duh­awm, contract thar la ziak lo Raheem Sterling an enthlak mek thu a sawi.

Real Madrid B team coach Zidane chuan, "Raheem Sterling hi tunge a nih kan hria a, a ṭhat zia pawh kan hriat avangin kan enthla mek tih phat rual a ni lo. Europe khawmualpuia player la naupang tak takte hi kan enkual reng a, Gareth Bale, Isco leh Raphael Varane te pawh rei tak kan enthlak hnua lalut chauh kan ni a, kan player enthlak te'n kan beisei an phak chuan Real Madrid-a khel turin kan sawm ṭhin a ni," a ti.

Tun season-a rawn che ṭha tak Raheem Sterling hian tunhnaia Liverpool-in contract thar an zawrh chu ziak duh loin a lo hnawl tawh a, hei hian a chhuah mai rinna a ti lian hle. Kum 20-a upa English winger duhtu zingah Real Madrid leh German champion Bayern Munich te chu a langsar pawl an ni.