I League Bengaluru leh Wahingdoh te chak zo lo

Thawhlehnia I League inkhelah Bengaluru-in an khelmualah Mumbai FC 1-1 in an draw hram a, Royal Wahingdoh-in khualmualah goal an khung theih loh avangin Sporting de Goa nen an inhnehtawk.

Bengaluru leh Wahingdoh te hi table-ah pahnihna leh pathumna an nih chhunzawm zel a, Salgaocar hnehtu palinaa awm Pune FC-in an hnaih ta hle.

Bengaluru-a Mizo awm zingah Champhai keeper Lalthuammawia Ralte chiahin starting eleven a chang a, Mumbai-in Rahul Bheke hmangin goal an khung hmasa zawk.

Second half-ah Lengpui wing back F. Lalchhuanmawia leh Saiha winger Beikhokhei Beingaichho te luh ruala lut Robin Singh-a'n minute 88-naah goal khungin 1-1 an inhnehtawk.

Goa-ah Wahingdoh an chung­nung zawk a, Lalchhawnkima leh Lalhmangaihsanga te'n starting eleven changin second half-ah C. Lallawmzuala a lut bawk.

Sporting de Goa midfielder Jovel Martins chu hun tawp dawn hnaihah hnawhchhuah ni mah se Wahingdoh-in goal an khung chuang lo.

Pune-in an khelmual Shree Shiv Chhatrapati Sports Complex-ah minute 82-naa Japanese mid­fielder Ryuji Sueoka goal hmangin Salgaocar an hneh a, Lunglei midifelder F. Lalrempuia chu Pune player pawimawh a ni.

Team Dinhmun

# Team Pld GD Pts

1 Mohun Bagan 10 12 24

2 Bengaluru 13 7 22

3 Royal Wahingdoh 13 2 22

4 Pune 12 5 20

5 Salgaocar 12 -3 14

6 East Bengal 10 2 13

7 Mumbai 12 -6 13

8 Bharat FC 10 -1 11

9 Shillong Lajong 10 0 10

10 Dempo 11 -5 10

11 Sporting Goa 13 -13 7