Championship aṭangin League One-ah Blackpool an tla
Premier League-ah te pawh kan lo hmuh tawh ṭhin Championship club Blackpool chu Championship aṭangin League One-ah an tla thla. Blackpool hian him turin nizan khan Reading an hneh a ngaih mai bakah Brighton and Hove Albion in Rotherham United an hneh a ngai a, mahse Brighton hi Rotherham lakah 0-1 in an tlawm ta si a, Blackpool an him zo ta lo a ni.
Blackpool hi kum 2011-a Premier League aṭanga an tlak thlak hnuin Championshi division-ah hian kum li chhung an cham a, tunah League One-ah an tla ta a ni. Blackpool tan kum 2007 hnua third tier-a an khelh hmasak ber tur a ni ang.
The Tangerines tia hriat lar Blackpool hian October thla aṭang tawh khan Championship division table mawngphah an lo luahlum tawh a, tun season chhungin match li chiah an khingpui te an hneh thei a ni.
An Premier League match khelh hmasak ber 2010-11 season-a an khelh ṭuma 4-0 a Wigan Athletic sawptu Blackpool hi 2014-15 season a English League lian pali club zinga division hniam lama tla hmasa ber an ni.
Manager thukhawchang
October thlaa Blackpool in an manager ṭang lai Jose Riga an ban hnu lawka coach a an rawih Lee Clark chuan, "Tun season-a thil thleng zawng zawng hi chu thleng nawn tawh lo tura duhthusam a ni. Kan thiam loh vang a ni tih hre reng mahila rilru erawh a na em em tho si. Season harsa tak kan hmachhawn a, tunah chuan insiamṭha leh tura May 3 nghakhlel taka thlir hi kan tih theih awmchhun a ni ta. Kan squad mamawh ang tak kan din anga, Championship-ah kir lehin team hlauhawm tak kan nihzia tihlan leh a ngai a ni," a ti.
Blackpool hi season ṭan dawn aṭang khan an talbuai sa nghal hrim hrim a, an match hmasa ber Nottingham Forest nen an khelh nan thla khat chiah an mamawh tawh tih khan squad-ah players pariat chiah an nei a ni.
Fans thukhawchang
Blackpool fan-te chuan result ṭha an neih loh avangin season tluanin an lungawi lohna an lo lan tir tawh a, fan-te'n an dem rawn ber chu an club neitu Owen Oyston leh a fapa KarlOyston te an ni.
Karl Oyston hi March thla khan fan pakhat hnenah ṭawngkam bawlhhlawh tak hmanga text message a thawn vangin Football Association chuan an lo hrem tawh nghe nghe.
Blackpool Supporters' Trust secretary Kevin Boroduvicz chuan, "Season rei tak chhung chu fan-te leh Blackpool neitu te inkarah hian inngeihlohna leh innghirnghona a lo awm tawh a, fans tan chuan hei hi chanchin lungchhiatthlak tak a ni. Kan duh ber chu kan khaw aiawha khel ṭhin club hmuh leh kha a ni. Division hniam zawka tlak hniam aia kan tana thil lungchhiatthlak zawk chu he club hian a nihphung leh a hlutna a hloh mek hi a ni," tiin an club neitu te chu a dem hle.
Blackpool season duhawm loh chu
Balckpool hian tun season-ah goal 79 chhuah tawhin England division sang pali club zinga goal chhuah hnem ber an ni. Hei mai hi a ni lo, England division sang pali club zingah tun season-a khualmuala chak la nei lo awmchhun an ni.
Tun season Championship-ah Blackpool tan players 50 ngawtin an khel a, club dang aia players an hman hnemna hi players pariat lai a ni. Hei ringawt pawh hian Blackpool hian season chhe tak an hmang tih chu a tilang chiang viau awm e.