Coppa Italia final-ah Juventus
Juventus chuan Artemio Franchi-ah Fiorentina 3-0 a hnehin Coppa Italia final an lut. Inkhel hmasa nena belhkhawmin Juve hi 4-2 in an chak a, June 7 khian Stadio Olimpico-ah nizana Lazio leh Napoli inkhela chak zawn nen final an khel ang.
Juventus hian inhliam vangin player pawimawh tak tak Carlos Tevez, Andrea Pirlo, Paul Pogba leh Stephan Lichtsteiner te chhawr thei lo mah se harsatna an tawk lo a, 1995 hnua a vawi khat nan Coppa Italia nomawi chawi thei dinhmunah an ding leh ta a ni.
Massimiliano Allegri team te hi an vannei a, tun hnaia che ṭha tak Fiorentina winger Mohamed Salah goal pawm a ni lo. Mualneitu lam hi first leg-ah 2-1 a an chak tawh avangin goal khung hmasa ngat se chuan Juve tan thawhleh a harsa tawh ang.
Juventus tan striker Alessandro Matri chuan minute 21-naah goal hmahruai a khung a, inkhel an thunun zui bawk. Bianconeri (Juventus kohna) winger Roberto Pereyra chuan chawlhlawk hma chiahin an goal hnihna a khung bakah defender Leonardo Bonucci chuan minute 59-ah goal khung belh leh a, hun tawp hma hretin Juve striker Alvaro Morata chu hnawhchhuah a ni a, goal erawh a luh belh tawh lo.
Tun season-ah Juve hi an khel ṭha tluang hle a, inelna lian pathuma champion thei dinhmunah an ding mek a ni. Serie A-ah point 14 zetin hma an hruai fal mek a, Champions League-ah pawh quarter-final lut tawhin Monaco nen an inhmachhawn ang.