Shabash Chanmari! I League 3 playoff an khel dawn

Mizoram Premier League hmahruaitu Chanmari FC-in I League 3 lamah pawh ro an rel a, Thawhṭanni zan khan MYJ–GMSC chu 1-0 a hnehin playoff khel turin an inpetkai.

Lalsangzuala Hmar enkawl Chanmari tan MS Dawngliana'n inkhela goal awmchhun a khung a, Mumbai club GMSC-in a chhanletna tur an neih loh avangin an tlawm - match khat khelh tur la nei chungin Chanmari an tlang.

Group tin aṭangin a sang pahnihte chu playoff khel turin an tling a, group C aṭanga Chanmari an tlang tawh avangin hmun ruak pakhat chiah a awm tawh - HAL SC leh GMSC ten beiseina an la nei ve ve.

Chanmari hian zanin dar 7:00-ah an match hnuhnung ber an khel dawn a, HAL SC an hmachhawn ang - chawhnu dar 2:00-ah GMSC-in RKM Football Academy an hmachhawn dawn a, hnehna an chan chuan zanin inkhel result-a zirin beiseina an la nei thei.

Goal chhuah loh!

Mizo club-in MPL kar lakah I League 3 an khelh ngai ṭhin mah se, an talbuai phah lo - an match hmasa berah 3-1 in Coramandal FC an hneh a, match hnihnaah phei chuan 6-0 ngawtin Chhattisgarh champion RKM Football Academy chu an hneh.

RG Stadium-a inkhelah Mizo club-in an chak chuan playoff an lut dawn chiang tih an hria a, an tlawm erawh chuan an hmaah tun inelnaa tema ṭha pawl HAL SC an ding dawn tih an hria - a tir aṭangin GMSC nawr an tum nghal.

Mahse, GMSC coach Vijith Sudhakar Shetty-a'n an dinhmun a hrechiang. Chanmari leh HAL an la inhmachhawn leh dawn tih a hria a, match tawp berah group C-a team nem bera chhal ngam RKM an hmachhawn dawn tih a hre bawk.

Hei vang hian Mumbai club-in Chanmari an draw a, match tawp bera RKM an hneh bawk chuan tlang turin chance an nei ṭha a, Mizo club lakah 4-1-4-1 in an inrem - tlarhnung ven chu thupui berah an nei.

GMSC an hlawhtling

Chanmariin goal khung tumin an khel a, GMSC lamin goal venhim hna an thawk tawp thung - inelna thlengtu team hi chhaih thinrim chu an tum ber a ni a, first half chhung zawngin an tumah an hlawhtling tiin a sawi theih.

MPL hmahruaitu hian chance mumal an insiam thei lo a, RKM laka hattrick siamtu Vincent Lalduhawma, Joseph Lalvenhima, Lalkhawpuimawia (Mapuia) leh Dawngtea ten bul an ṭan vek chungin GMSC tlarhnung ṭhiah an harsat a, RG Stadium-ah an talbuai hman hle.

First half-a Chanmari chance neih chhuna sawi theih chu Mapuia koah a tla a, mahse, hnai tak aṭanga Kelkang striker volley chu GMSC keeper Paramjit Baghel chuan ṭha zetin a lo dansak a, chance dang han phulpui tur a awm lo.

GMSC pawhin chance an nei ve tho a, mahse, tlarhmaa maltlat Himanshu Patil chuan hnai set sawt aṭanga tauh goal theihna remchang nei mah se, a hun ṭha neih a khawhral a, goal lut loin inkhel a tawp mai dawn niin a lang.

A changtupa Dawngtea

Mahse, Mizo club-in beidawng loin an nawr chhunzawm a, mahni khelmuala chak zo lo nih an duh lo. Coach Sanga'n KC Malsawmsanga leh Moses Lalrinzuala te minute 56-naah a luhtir a, player pahnih luh hnuah an nawr a na lehzual sawt.

Sanga'n Mapuia la chhuakin K. Lalhmangaihkima chu minute 80-naah a luhtir zui a, a hnu minute khat lekah goal kan hmu zui - Sawmsanga'n GMSC defender rual ven karah a 'shot' a, hei hi Dawngtea ke bulah a tla.

Mizo forward tawnhriat nei ṭha hian amah vengtu Keegan Pereira a vir khum hnuah mawi zetin goal-ah a chantir a, GMSC tlarhnung an hawihai - Mumbai club tan si phurh sut turin hun a tam tawk tawh lo a, an tlawm.

GMSC hian an match hmasa bera HAL SC nen an inhnehtawk ṭumin, hun pek belhah corner aṭanga ball kal chu si phurh sut nan an hmang a, Chanmari lakah pawh hun pek belhah chance an nei. Mahse, penalty box aṭanga hnai taka freekick an hmuh chu Keegan chuan goal-ah a chantir thei lo a, Chanmari an chak.

Engtin maw?

Chanmari hian group C-a team hmuhnawm leh ṭha HAL SC chu zanin hian an match tawp ber tur atan an hmachhawn dawn a, Bengaluru club laka 'fight' kher ngai loa playoff dinhmun an chingfel hi an lawm khawp ang.

HAL SC erawh la tla thei an ni thung - BDFA Super Division champion hian Thawhṭanni chawhnu khan Coramandal FC chu 5-0 in an sawp a, Chanmari nena an inkhel tur thlir ran chungin second half-ah substitution an siam nual bawk. Zanin inkhel a hmuhnawm dawn a, Chanmari hian chak vek chunga playoff khelh an duh dawn.

Coramandal hian match li an khelh tawhah vawi khat chiah hnehna changin an tla chiang tawh a, RKM-in match khat khelh tur la nei mah se, an tlawm vek avangin an tla tawh bawk - vawiin dar 2:00-ah GMSC an hmachhawn ang.

GMSC hian tlin theih dan an la nei - chumi tur chuan an ngam loh zawh chiah Chanmariin HAL SC an ngam loh a ngai a, RKM lakah si nga fai tala an chak a ngai dawn bawk.