Indian football team - an la insiam rem lo!

Intercontinental Cup 2024 champion chu Syria an ni - Thawhṭanni zan khan Syria hian 3-0 in India an hneh a, coach thar Manolo Marquez-a kaihhruaina hnuaiah Blue Tigers an la insiamrem hman lo a ni ber.

Syria tan hian Mahmoud Al-Aswad, Daleho Irandust leh Pablo Sabbag te chuan goal khat ṭheuh an khung a, India-in a chhanletna tur an neih loh avangin anmahni huaihawt tournament-ah mikhual an champion.

Intercontinental Cup-ah hian Syria bakah Mauritius te chu inelna hmachhawn turin an lo kal a, India-in match hnih an khelhah chak an nei lo - Mauritius an inhnehtawkpui hnuah Syria an ngam lo zui a, international break theihnghilh tlak a ni.

Syria erawh coach thar, UEFA European Under-19 Championship 2024-a Spain champion puitu Jose Lana hoa inelna an hmachhawn hmasak berah nomawi an chawi nghal a, India hma hian Mauritius chu 2-0 in an hneh bawk.

Beiseina neitu

India coach Manolo-a hnuaiah Blue Tigers insiamrem an tum a, mahse, hneh ngei tura ngaih Mauritius laka an chak zawh loh avangin fans tam tak an lungawi lo - team ṭha zawk Syria lakah beiseina tihsan a harsa a, tlawm erawh an tum lo.

GMC Balayogi Gachibowli Stadium, Hyderabad-a inkhelah Manolo-a'n chak a tum a, Mauritius laka chak zo lo team aṭangin bul ṭantu pasarih ngawt a thlak danglam. Mizo midfielder Lalengmawia Ralte (Apuia) pawh bench lamah a awm a, Lallianzuala Chhangte chu khawih danglam loh tlemtê zinga mi a ni thung.

Mahse, Manolo-a beisei angin India an khel zui lo. Syria coach Lana-a'n Mauritius nena inkhel aṭangin a starting XI a thlak danglam hlak a, inkhel hamrik a rik rualin Syria hian India an nawr nghal - goal khung tur pawhin an nghah rei a ngai lo.

Swedish top division club IF Brommapojkarna forward Daleho Irandust chuan box chhungah ball la lutin, Al-Aswad tan a siamsak - kum 20 mi attacking midfielder shot hi Anwar Ali chuan lo dang mah se, Jeakson Singh a per hnuah Al-Aswad-a ke bulah bawk a tla a, Iraqi club Zakho player hian goal-ah a chantir.

Syria bawk chu

India an che hleithei lo a, Syria-in an nawr chhunzawm. Goal an khung aṭanga minute thum hnu lawkah Alaa Al-Dali chuan crossbar a tihper a, a hnu lawkah Mohammed Osman-a chance neih tur chu goalkeeper Gurpreet Singh Sandhu chuan a tibuai hman bawk.

Al Dali hian chance dang nei zui mah se, a finishing tawih lo zarah India an him a, minute 28-naah India an lang ve zawk - mahse, Subhasish Bose siamsak chu Lianzuala'n goal-ah a chantir thei lo a, a tauh over.

India tlarhma kan hmuh chhunzawm a, an zia tial tial. Mahse, Sahal Abdul Samad-a chance neih chu Syria tana a match hmasa ber kheltu goalkeeper Elias Hadaya chuan a dansak a, LZa'n chance dang neih chhunzawm mah se, a chhawr bik lo.

Chawlhlawk laiin Manolo-a'n thu a hrilh ṭha tih a lang a, Asish Rai leh Apuia chu bench aṭanga luhtir ni bawkin, game a danglam sawt - Asish leh Apuia ten tlarhnung an venpui piahlamah attacking-ah an thawhhlawk hle.

Vanduaina

Second half ṭan aṭanga minute 10-naah Lianzuala bawk kan hmu a, Mumbai City captain thar hian Sahal-a siamsak chu ṭha zetin shot mah se, Syria keeper Hadaya-a'n a dansak a, Mizo tlangval vanneih zan a ni lo.

India ṭantuten goal an beisei laiin an beisei loh lam aṭangin an hmuh chhunzawm - khel ṭha em em mai Irandust chuan minute 76-naah an goal hnihna a khung a, hun pek belhah Peruvian club Alianza Lima forward Pablo Sabbag chuan chak nemnghehna a khung zui bawk.

Blue Tigers an vanduai, tiin a sawi theih - bench aṭanga luhtir Edmund Lalrindika'n ṭha zeta ball a tlan luhpui hnuin goal-ah a chantir thei lo a, Mahesh leh Liston Colaco te chance neih chu engmah lo maiah a chang a, LZa'n crossbar a pet per bawk.

India coach Marquez chuan, "First half-a kan khelh dan avangin ka lawm lo a, goal pawh kha veng thei tur chu kan ni. Second half kan khel ṭha a, goal luh dan hian game a hrilhfiah phak lo. Goal khung kan phu," a ti a, second half-a an khelh danah a lawm thu a sawi.