A chung berah Sinner a nghet
Mipa tennis thuneitu sang Association of Tennis Professionals (ATP) chuan world ranking thar an ti chhuak leh ta, a chung berah Jannik Sinner chuan point 11,180 hmuin a dinhmun a sawhnghet ṭha hle.
Tun season atana Grand Slam hnuhnung ber US Open an khelh dawn khan, kha tih laia number 1 Sinner leh pahnina Djokovic te inkarah point 1900 a awm, inelna an hmachhawn zui a ni.
Italian tlangval Sinner hi a champion a, nomawi bakah ranking point 2000 a hmuh belh. Djokovic erawhin a nomawi a hum thei lo, third round lekah a tlak avangin a point hum tur zinga 1900 chu a hloh a, a tlahniam ta duai bawk.
Serbian star Djokovic hi nasa taka tlahniam thei dinhmunah a ding hman, mahse a elpui dangten US Open an khelh ṭhat tawk bik loh avangin palinaah a la inhamtang chhunzawm a ni.
Sinner dawtah hian Alexander Zverev a awm, German tlangval hian point 7,075 hmuin world ranking lama a tawn san ber ṭum a thleng a, mahse a chunga awm a phak lohna hi point 4,105 ngawt a nih avangin an inkar chu a zau hle.
Pathumnaah Carlos Alcaraz a awm - Spanish star hian US Open khelh hma khan world number 1 ni chunga season tawp hman a tum thu a sawi, mahse second round lekah a tla, point a hum tur zinga 670 a hum theih loh avangin hmasawn zawngin a kal thei rih lo.
Taylor Fritz chuan nasa takin hma a sawn thung. American tlangval hian a vawi khat nan Grand Slam final a lut a, nomawi inchuhna inkhelah Sinner hneh lo mah se, ranking point 1,300 a hmuh belh phak.
US Open 2024 finalist Fritz hian a hma lama player awm panga ngawt a kal kan a, tunah chuan world number 7 a ni. United States player zinga ranking sang leh a sang zual 10 zinga awm phak awmchhun a ni hial.
Tun season chhunga Grand Slam khelh tur pali - Australian Open, French Open, Wimbledon leh US Open an khel zo tawh a, number 1 Sinner leh Alcaraz ten pahnih ve ve in an insem.
Player ropui bik Roger Federer, Rafael Nadal leh Novak Djokovic ten hun rei tak chhung tennis inelna an thunun a, anni pathum inkarah hian Andy Murray leh Stan Wawrinka te an lo lang ve ṭhin bawk.
Tunah erawh thawnthu a danglam chho mek, kumina major title pali insemtu Sinner leh Alcaraz te hi kum 23 leh kum 21 mi chauh an la ni. Kum 1993 hnu lamah, season khat chhunga kum 23 hnuai lamin major title pali an lak theih vawi khatna a ni hial.
Djokovic chuan, "Champion thar kan hmu a, tennis khawvelah hmel thar kan hmu zel bawk. Tunah chuan inelna ropui nei tur thar kan hmu ta niin ka hre bawk, hei hi thil lawmawm lai chu a ni," tiin a sawi.
Grand Slam dawta inelna ngaihhlut Masters 1000 zinga mi ATP Finals an la hmabak, ranking sang zual pariat inelna tur a ni leh dawn a, a thiam zual bikte an nih avangin ngaihhlut a hlawh leh hle ang.