MPL11-ah player 67-in goal an khung tawh

LZ Juice MPL11-ah round kua khelh zawh a ni tawh a, round nga khelh tur a la awm. Match 36 khelh tawh aṭangin goal 127 a lut a, player 67-in goal an khung a, match tina goal 3.53 lut ang a ni.

A goal tam mah mah!

Football hmuhnawmna hi goal aṭanga teh a ni fo a, inkhel hmuhnawm tur chuan goal luh tam a ngai. Chutihrualin MPL11-a goal luh tam dan erawh a fuh ber lo.

Team lian zawkin team te an sawp fo a, round 6-ah phei chuan match li lekah goal 21 ngawt a lut a, round 7-ah pawh goal 19 a lut tling.

Goal luh tam chhan hrang hrang a awm thei ang a, chhan lian tak pakhat erawh MPL11 ṭan hma vang a tih theih ang. Ṭum dang zawng aiin MPL ṭan hma a ni a, inelna ṭantirh lamah team an inrem fel hman lo.

Inelna chanve khelh chhoh tawh hnuah team an insiamrem chho chauh a, club ṭhenkhat tan chuan a pawi thui hman hle. Chutihrualin match nga khelh tur a la awm avangin thil thleng thei lo a awm lo. Table mawngphaha awm FC Bethlehem pawh semifinal khel thei an la ni.

MPL ti hlutu

MPL hmasa ber top scorer MS Dawngliana'n MPL11-ah pawh top scorer beiseina a la nei a, goal nga a khung tawh. Covid-19 vangin MPL ṭum hnih khelh a ni lo tih hriat a ṭha a, Dawngtea hi Mizo player daih rei zinga mi a ni.

Mizoram Police lamah MPL-a sulnu nei ṭha an ṭhahnem. MPL season khata mimal lawmman mi pakhatina a lak theih la vektu F. Lalrinpuia pawhin MPL11-ah goal a la khung. Valpuia hi MPL hmasa berah best forward a ni a, MPL4-ah khan top scorer, best forward leh best player lawmman a dawng.

Police captain Lalfakzuala pawh hi MPL ṭantirh aṭangin player ṭangkai a ni zel a, MPL6 leh MPL7-ah khan top scorer ni ve vein MPL11-ah pawh a la khung.

Lalbiakhlua (Biaktea) hming lam hmaih a thiang lo a, MPL10 final-a goal khungtu Biaktea hian MPL11-ah pawh goal a la khung. Fakzuala ang thoin Biaktea hi kum zawnin top scorer a ni tawh a, MPL2 leh MPL3-ah khan top scorer a ni.

MPL2 best player R. Malsawmtluanga pawh a la thiam reng a, MS-a hi Mizo zinga MPL best player ṭum hnih dawng thei awmchhun a la ni a; MPL11-ah pawh goal hnih a khung.

Top scorer tur chu?

MPL11-a top scorer tur hriatthiam a la har hle. Goal khung tam ber Felix Lalruatsanga hian match zawnin goal a khung tawh lo a, Serchhip tlangval hian goal riat khung tawh mah se a dinhmun a him lo.

Aizawl FC forward pahnih C. Lalhriatpuia leh Lalbiakdika te hi Felix-a elpuite an ni a, player ṭha pahnih hian goal ruk ve ve an khung. Team-a an pawimawh dan te, an khelhtir dante thlirin top scorer hi Felix emaw Hriata emaw BD-a emaw te an nih a rinawm hle.

Chutihrualin season tawp hma chuan engmah a la chiang lo. Chanmari FC-in I League 3 final round an khelh chuan goal nga khung tawhtu Dawngtea tan top scorer nih a harsat phah thei ang. Goal khung tawh zat aṭanga thlir chuan Augustine Lalrochana pawhin goal nga a khung tawh a, dah bo a thiang lo.

Police forward F. Lallawmkima'n goal li a khung tawh a, mahse midfield laia an chhawr hnuin Lawma'n goal a la khung leh lo - match thum chhung chu a zawnin goal a khung tawh lo.