Martin Odegaard a hliam

Arsenal captain Martin Odegaard chu Norway tana a feh chhuahna lamah a hliam a, hetih lai hian Manchester City forward Erling Haaland chuan an ram hi Austria lakah 2-1 in a chakpui thung.

Thawhṭanni zan Nations League inkhelah Norway leh Austria te an inkhel tawk hle. A tir lama Felix Myhre goal khung chu Marcel Sabitzer chuan chawlhlawk hmain a sut a, hun tawp dawn lamah Haaland-a'n chakna goal a khung a ni.

Inkhelh zawh a sawi zui hlawh chu Odehaard inhliam a ni. Gunners midfielder hi Christoph Baumgartner chuan a kerekah a ti hliam a, thlak niin mittui nen khelmual a chhuahsan.

Arsenal hian tun kar tawpah Tottenham Hotspur nen Premier League an khel dawn, hrem vangin midfielder ṭha Declan Rice chu an chhawr thei dawn lo a, defender thar Riccardo Calafiori pawh Italy tana a feh chhuahna lamah a hliam bawk.

Norway coach Stale Solbakken chuan, "Kerek hliam a ni a, ruh tliak a awm loh chuan a chawlh a ngai rei lo mai thei. A lan danah chuan na a ti hle," a ti a. Mikel Arteta tan chuan chanchin hriat nuam tak a ni lem lo ang.

Team doctor Ola Sand pawhin na tak a nih loh hram a beisei thu a sawi a, chutihrualin a dinhmun dik tak hre tur chuan endik hmasak phawt a ngai dawn tih a sawi a, tun kar tawpa inkhelh leh nghal chu atan a hma mai thei.

Arsenal hian hmabak an nei hautak chho dawn - Spurs nen an inkelh hnuah Atalanta nen Champions League bul an ṭan dawn. Italian club hnua an tum leh hmasak tur chu Manchester City niin Etihad Stadium-ah an lut ang, heng inkhel pathum hi September thla chhunga thleng vek tur a ni.

Tun hnai season hnih chhung chu Gunners hian EPL khel ṭha ṭhin viau mah se, coach ṭha Pep Guardiola enkawl Man City hi an tluk lo, tun season an intawn hun tura an boruak tawn mek hi hriat a nuam lo ang.