Belgium ngamtu France
Hmanni lawk khan an mahni khawpui Paris chhunga khelmualah ngei France an tlawm a, chetsual nawn erawh an duh lo. Didier Deschamps-a naute hian Thawhṭanni zan khan Belgium an mikhual a, an mikhual lakah hian 2-0 in hnehna an chang.
Parc Olympique Lyonnais-a inkhelah hian, France tan Randal Kolo Muani leh Ousmane Dembele ten goal khat ve ve an khung. Kevin de Bruyne hoa inlan Belgium lamin a chhanletna tur an nei lo.
France an chak
Deschamps-a'n a captain Kylian Mbappe chu bench lamah a dah a, midfielder tawnhriat nei ṭha N'Golo Kante chuan captain armband hreng chungin inkhel bul a ṭan a, inkhel chawinungtu a ni chhunzawm bawk.
Belgium lam an hlauhawm hmasa - captain De Bruyne freekick pet chu Dodi Lukebakio chuan a su lut teuh hle, mahse goalkeeper Mike Maignan-a'n awmna tur hmun a thlang fuh a, a lo dansak thei hram.
A hnuah erawh mualneitu lamin inkhel an thunun hneh hle - Kolo Muani kan hmuh chhunzawm. Qatar World Cup final-a hun ṭha hlahtu hian Dembele-a shot an danper chu a lo chang fuh a, na zetin goal hmahruai atan a hlap lut.
Dembele a hmuhnawm chhunzawm zel, PSG forward hian defender Arthur Theate leh Zeno Debast te a paltlang a, a chhaka awm Wout Faes-a'n a rawn nanchin leh hma chiahin mawi takin a thlawh lut.
Belgium tan bench aṭanga lut, midfielder Charles De Ketelaere leh De Bruyne ten si phurh sut ṭhen theihna remchang an nei ve ve, mahse goalkeeper Maignan an paltlang thei tlat lo - AC Milan si ban nghaktu hi a dingnghet hle.
Substitute Mbappe-a'n khelmual a luh hnuah nuamti takin a khel, mual sir lama amah vengtu a chhaih buai hneh hle - vawi hnih chu paltlang thei mah se goal atan erawh a chantir thei mai bik lo a, ram tana 48 a khung tawh a la belhchhah rih lo a ni.
An thu leh hla
Paris Saint Germain a chhuahsan a, an ram mipui a bik takin PSG ṭantuten an ngaithiam lo hle. PSG khelmuala an inkhelh ṭumin Mbappe hi auhel a ni a, ram aiawh ni mah se Belgium an hmachhawn ṭum pawhin aueltu an awm tho bawk.
Les Bleus tan hian a inlan hnuhnung pangaah goal a khung lo - ram tana goal a khung hnuhnung ber chu Euro inbuatsaih laia Luxembourg an hmachhawn ṭumin a ni, tun hnaiah goal khung lo mah se Deschamps chuan a la ringtawk hle.
France coach Deschamps chuan, "Kylian chungchangah hi chuan ka chiai ngai lo a, tun hnaiah goal khung tam lo mah se ka buai lem lo. Chiang taka ka sawi ngam chu, thla khat chhung lekin tun aia ṭha leh hlauhawm zawkin a rawn inlan leh ang," a ti.
An khelh danah Kevin de Bruyne pawh a lawm tawk lo - Belgium captain hian kawng tinrenga hmasawn an mamawh thu a sawi a, an tih ṭhat tawk lona lai siamṭhat ran a pawimawh tih a sawi tel bawk.
De Bruyne chuan, "Keimahnia a ṭha ber kan pe chhuak tur a ni a, chumi kan ti thei lo emaw kan tum lo emaw a nih chuan awmzia a awm lo, a chhan chu khawvela a ṭha berte nen kan inel avangin keini pawh kan ṭhat a ngai.
"Tlarhnungah player paruk kan indah a nih chuan ṭha taka khelh ngaihna a awm lo," tiin an khelh dan a sawisel a, an coach Domenico Tedesco chuan De Bruyne chu chak duhna thinglung neitu a nih avangin a hriatthiam thu a sawi ve thung.