Mizoram tan beiseina tlem a la awm

Sub Junior Boys' National Football Championship 2024-25-ah Mizoramin match hmasa bera Delhi 5-2 a an hneh loh hnuin Odisha 9-1 in an sawp a, semifinal lut turin beiseina tlem a la awm. Vawiin chawhnu dar 1:00 hian Delhi leh Odisha an inkhel ang a; Odisha-in hnehna an chang a nih chuan Mizoramin knockout stage an lut thei ang.

Mizoram team hi coach Lalrindika leh manager S. Malsawmtluanga ten an ho a, player-te hi Naupang League khel vek an nih avangin beisei pawh a sang hle. Mahse, player 10 ngawtin TW3 test an paltlang loh avangin an thlak a ngai a, an ṭhat theih dan berin inelna an hmachhawn thei lo.

Kum bithliah inelnaah Mizoram an nau ta hret a, match hmasa berah pawh Delhi lakah 2-0 in hma hruai mah se second half-ah 5-2 in an inlethaltir. Match hnihnaah erawh Mizoramin an thiam tak an pholang a, Odisha 9-1 in an sawp.

Bangalore Football Stadium-ah Mizo naupang an tlangnel a, an passing mawi leh finishing ṭha chu hmuhnawm a tling. Nicholas Remruatfela'n hattrick a siam hnuah Jason Lalawmpuia'n goal li a khung a; Zosanguala Kawlni leh C. Lalhmingropuia ten goal khat ve ve an khung bawk.

Mizoram tan tih theih a awm tawh lo a, Delhi-in Odisha laka point an hmuh hrim hrim chuan semifinal an lut dawn. Chutihrualin tun ṭuma Mizoram chet ṭhat tawk loh chhanah TW3 test a puh theih a, he test vang hian kum dik ni ngeia ngaih Mizo naupangte chu paih a ni.

Mizoram chauh hi TW3 test tuartu an ni lo a, an group-a awm ngei Meghalaya pawh player an chhawk tam avangin inelna hmachhawn thei loin an haw hial. Tier 2 lamah Sikkim leh Chhatisgarh te player chhawk an tam avangin inelna an hmachhawn thei lo bawk.

AIFF match commissioner Malsawma Renthlei chuan, "TW3 test (wrist X-ray) hi India rama age verification proof atana kan rin ber hi a la ni rih. Dik famkim lo mah se tun dinhmunah chuan hei aia age verification test, hautak lutuk si lo, kan neih theih dan chu a la ni rih bawk si. Chutihrualin TW3 test a result hi chu vanneih leh vanduai a ni ber tawhin ka hria.

"Mizoramah chuan Trinity Hospital-in a test hi an kalpui a chumi Dicom (an X-ray thlalak) chu AIFF thawhpui RXDX company Bangalore hnenah an zu thehlut a. Anni hian result an lo siam ta ṭhin. India rama state dangte pawhin anmahni state-a Hospital-ah X-ray hi an kalpui vek a mahse RXDX hnenah hian an thawn ve vek a ni," tiin Vanglaini a hrilh.