Ballon d'Or mak titu Rodrygo

Real Madrid forward Rodrygo chuan 2024 Ballon d'Or dawng thei tura chhawp chhuah mi 30 zinga a tel lo chu mak a tih thu a sawi.

Kum 23 mi Rodrygo hian season hmasa khan Real Madrid tan inelna hrang hrangah match 51 khelin goal 17 a khungsak bakah, a ṭhiante goal khung tur vawi kua a siamsak bawk.

Spanish club lianin La Liga leh Champions League nomawi an chawi theih nana tha thawh hnem zinga mi a ni, club lam a khelh pui Jude Bellingham leh Vinicius Junior te erawh hming langsar zingah an tel thung.

Brazil international Rodrygo chuan, "Player thlan chhuah 30 te kha an ṭha tawk ka ti viau a, chutihrualin ka khelh dan leh sulhnu en erawh chuan tel ve ka phu niah ka ngai, ka tel lo kha mak chu ka ti angreng hle," a ti.

Bellingham leh Vinicius Junior te bakah hian Real Madrid player Dani Carvajal, Federico Valverde leh Antonio Rudiger te bakah chawl ta Toni Kroos te hming a lang bawk.

Spanish champion hian player an thawh hnem hle, nipui laia an lakluh Kylian Mbappe hming pawh a lang. France captain erawh Paris Saint Germain tana a khelh laia a sulhnu avanga telh a ni thung.

Ballon d'Or dawng thei tura chhawp chhuah mi 30 hi France Football editorial bakah, Ballon d'Or ambassador Didier Drogba leh chanchinbu mi ṭhenkhat ten an thlan chhuah an ni a, heng player aṭang hian thlan bik an la awm leh dawn a ni.

Football mimal chawimawina sang hi October 28 hian Paris khawpuiah a dawngtu puan a ni ang.