Italy chak nawn

Luciano Spalletti hnuaia indinthar mek Italy chuan kawng dik an zawh - Azzurri hian Thawhṭan zan Nations League inkhelah Israel chu 2-0 in an hneh a, an match hmasa zawkah France an lo hneh tawh bawk.

Italy tan hian Davide Frattesi chuan goal hmahruai a khung, second half-ah Moise Kean chuan an goal hnihna khungin anmahni goal an venghim tluan thei a, an phu ang ngeiin point thum an hlawh chhuak a ni.

Euro 2024 khelh zawh takah khan Italy hian beisei an phak lo, last 16-ah an zinkawng a tawp. Coach Spalletti-a'n dinthar leh a tum a, an khelh dan phung ṭhenkhat pawh a thlak, tuna a lan dan chuan an ṭhat pui dawn hle niin a rin theih.

Italy coach Spalletti hian a naute hi 3-5-2 hmangin a rem ṭhin a, hmang thiam dawn viauin lang mah se a player neih dan leh an khingpui tur a zirin an la insiamrem thei zel tih a sawi a, tun ṭuma koh loh player tan pawh kawngka a la inhawng tih a sawi bawk.

Match hnih an khelh tawh chinah Azzurri hian Israel leh France hnehin point ruk an hmu a, team pali awmna group 2 hmahruaitu an ni - an hnuaiah hian Les Blues leh Belgium ten point thum ve ve hmuin an zui bawk a ni.