Pathumnaah Pegula inhlangkai

Jessica Pegula chuan US Open nomawi chawi phak ta chiah lo mah se chanchin lawmawm a nei. Hmeichhe tennis thuneitu sang Women's Tennis Association (WTA) ranking tih chhuah tharah, a sang pathumna dinhmun a luah.

United States nula hian a vawi khat nan Grand Slam final a lut a, anmahni ram khawpui lian pakhat New York-ah inkhelin Aryna Sabalenka a ngam lo thung, mahse ranking point a hmuh belh tam avangin a tawn san ṭum a thleng.

Iga Swiatek chu hlawhtling ta chiah lo mah se a chung berah a la awm chhunzawm a, a chesual viau a nih nghawt loh chuan Polish nula hian number 1 ni chungin kum tawp a hmang leh theiin a rinawm.

Belarus nula, tun season chhunga Australian Open leh US Open nomawi chawi kawp thei Sabalenka chu pahnihna a ni - tun season tawp hmain Swiatek nena an inkar sawr zim zual zel a tum ngei ang.

US Open 2023 champion, kumina a nomawi hloh ta Coco Gauff chu paruknaah a tla hniam. Gauff hian amah ang bawka American player Emma Navarro chu fourth round-ah a ngam lo a ni.