Brazil leh Argentina an chak lo

South America aṭanga World Cup 2016 khel tur zawnnaah, world champion Argentina leh Brazil te chu nimin zing khan an chesual, an khingpui lakah an tlawm ve ve a ni.

Brazil hian an mikhualna ramah Paraguay chu 1-0 in an ngam lo a, inkhel dangah Lionel Messi tel lohna Argentina chu Colombia lakah 2-1 in an tlawm bawk - football ram ropui pahnih an mualpho.

Harh ngai Brazil

Tun hnaiah Brazil an che ṭha tawk lo, tun ṭuma match an khelh hma hian coach Dorival Junior chuan World Cup 2016 final an khelh tur thu a sawi a, qualifying match an khelh dan thlir erawh chuan siamṭhat tur lai an ngah hle tih a chiang.

Chaco Defenders Stadium-a inkhelah goal khat chauh kan hmu, kan hmuh chhun erawh goal mawi bik zinga mi a ni. Minute 20-naah Inter Miami midfielder Diego Gomez chuan box pawn aṭangin goal kilah tawih zetin a thlawh lut.

World champion vawi nga ni tawh Brazil tan hian tlarhma lamah Real Madrid trio - Rodrygo, Endrick leh Vinicius Junior te an awm, an hming lar viau mah se chawlhlawk hmain goal zawna pet an nei thei miah lo.

Goal an khung theih loh laiin an chhuah zui a, Liverpool goalkeeper Alisson, Newcastle midfielder Bruno Guimaraes leh West Ham playmaker Lucas Paqueta ten tih theih an nei tam lo, team pum an insiamṭhat a ngai.

Brazil hi qualifying match vawi riat an khelh tawhah vawi li ngawt an tlawm ta, vawi thum chauh an la chak avangin team 10 inel zingah pangana an ni a, an player neih dan leh tun hma lama an sulhnu en chuan an awmna hi an inhmeh lo.

World champion vawi nga ni tawh Brazil defender Marquinhos chuan, "Kan coach hian team ṭhat theih dan ber tur a la zawng mek, player thar kan neih nual avangin inrintawkna kan la nei tam tawk lo bawk.

"Qualifying hi a awlsam ngai lo tih kan hriat a ngai bawk. Tunah hian insiamremna hun kan nei mek a ni a, kan ruahman leh beiseina te a hlawhtling thei a nih chuan kan tho chhuak leh em em ang," tiin a sawi.

Messi tel lohna

Hliam vangin tun ṭum World Cup qualifying-ah hian Lionel Messi koh a ni lo, an match hmasa lamah harsatna tawk lo mah se, team ṭha Colombia an hmachhawn chiah chuan captain Messi an mamawh tih a takin a lang.

Colombia hi tunlai team ṭha zinga mi an ni a, hmanni lawk pawh khan Argentina nen hian Copa America final an khel. Nimin zing inkhelah pawh hian minute 25-naah Yerson Mosquera hmangin goal an nei hmasa.

Second half-ah Argentina hian Nicolas Gonzalez hmangin an sut. Mahse, Nicolas Otamendi chuan Daniel Munoz lakah penalty a chawi, a pettu James Rodriguez chuan goalkeeper Emiliano Martinez bumin an goal hnihna leh chakna ni nghal bawk chu a khung.

Messi awm loh laia captain dinhmun chelhtu Rodriguez chuan, "Goal hi ka khung zen zen lo, team ṭha Colombia lakah ber kher a ni ang tih pawh ka ring ngam lo hial zawk. Engkim hlan huama inlan lakah kan chak lo erawh a pawi ka ti hle.

"Colombia khan thlawptu an nei ṭha em em a, khelmual sir lam kha kan en a nih chuan kawr eng hla an tlep tuarh mai a, anni khan player an tlawp ṭha hle, tun ṭum atan chuan hnehna chan phu khawpin an khel ṭha zawk a ni," tiin a sawi.

Inkhel dangah Manchester United player thar Manuel Ugarte chuan Uruguay tan inkhel bul a ṭan a, mahse Paris Saint Germain player hlui hian Venezuela lakah an ram a chak pui zo lo, goal lut lo 0-0 in an inhnehtawk a ni.

South American ram 10 ten World Cup qualifying an khel a, vawi hnih ṭheuh an inkhelh kual hnuah a sang zual paruk chu an tling nghal dawn. Pasarihna pawhin playoff an la khel thei dawn a, an ranking a san hlawm avangin ticket an nei tam ṭhin.