England tana match 100 kheltu Harry Kane Goal hnih hmangin mellung phun a lawm

Harry Kane chuan England tan match 100 a khel tling ta a, mellung hlu bik a phun zan hian a lawm nan goal hnih a khung - Three Lions hi Finland lakah 2-0 in hnehna a chanpui a ni.

Manager lailawk Lee Carsley enkawl England hian Nations League match hnih an khelh tawhah point ruk an hmu a, League B Group 2-ah pahnihna an ni mek - point inangah goal difference nei ṭha zawk Greece chuan hma an hruai thung.

Three Lions chu

Thawhlehni zan Wembley Stadium-a Nations League inkhelah a ṭan hmain Sven-Goran Eriksson hriatrengna hun hman a ni a, ram tana match 100 khel tlingtu Kane lawmpuina hun hman a ni bawk - boruak inang lo tak pahnih a kal kawp.

Team ṭha zawk England hian inkhel thunun mah se goal erawh an khung thei nghal mai bik lo. Finland lamin counter attack hmangin an bei let zauh ṭhin, forward Topi Keskinen chuan remchang nei mah se goal ban hrulah a pet chhuak.

Bukayo Saka a hlauhawm, a shot an lo dan pial chu goalkeeper Lukas Hradecky chuan a lo dansak hman hram - Arsenal forward hian Kane tan a siamsak bawk a, lo tauh lut mawi viau mah se offside vangin goal hi hnawlsak a ni phawt.

Match hmasa lama goal a khung baka assist neitu Declan Rice pawh a vannei zui lo a, a hnu zelah erawh Kane dan reng theih a ni lo. Trent Alexander-Arnold ball fing a dawn chu rang taka insiamrem puiin goal lamah a pet pawp a, chiang tak maiin a lut.

Kane hian goal a khung hmain freekick hlauhawm takin a chhuih bawk a, goalkeeper Hradecky chuan lo zuan fuhin a lo dang hram. Bayern Munich striker Kane hian England tana a match hmasa ber kheltu Noni Madueke siamsak khungin an chak a nemnghet.

Kane leh Mellung

England tana match 100 khel tling thei player an lo awm nual tawh, mahse match 100 an khelh tlin nia goal hnih khung thei erawh Kane chauh a la ni. Wayne Rooney (2014) leh Bobby Charlton (1970) te chuan mellung an phun ni hian goal khat an khung thung.

Ram tana goal 68 khung tawhtu Kane chuan, "Ka tun hma lam hun ka ngaihtuah a, inkhelh phakna tur zawng leh intuaihriam turin Millwall, Norwich leh Leicester lamah loan hmangin ka kal. Khatiang hun lai ngaihtuah chuan ram tana match 100 khelh hi chu a mak.

"Naupang ka nih lai aṭang khan inrintawkna neih harsa ka ti ṭhin a, chuvangin ka tan hian kawng a awlsam vek lem lo. Inkhel tur hian nasa takin ka inbuatsaih ṭhin a, tunah chuan player puitling niin training leh match khelh dawnah ka hlauthawng ngai tawh lo," a ti.

Kane hian kumin July thla khan kum 31 a tling chiah a, ram tan hmabak a la nei nual tura ngaih a ni. Rooney (2014) hnuah England tana match 100 khel tling leh thei hmasa a ni a, ram tana inlan tam lamah pawh midang an khum chho a nih pawhin a mak lo ang.

Three Lions tana match khel tam ber chu Peter Shilton (125) a ni a, a dawtah Rooney (120) awmin David Beckham (115), Steven Gerrard (114), Bobby Moore (108), Ashley Cole (107), Bobby Charlton (106), Frank Lampard (106) leh Billy Wright (105) te an awm bawk.