Germany leh Netherlands an intluktawk

UEFA Nations League-ah Thawhṭanni zan khan Netherlands-in Germany an mikhual a, 2-2 in an inhnehtawk. Euro 2024 hnuah Germany-in bul ṭan ṭhain Hungary 5-0 in sawp mah se Netherlands lakah an tlarhnung a pawp a, chutihrualin tlarhma lamin hna an thawh ṭhat avangin point khat a hlawh chhuak tho.

Group 3 inkhel dangah Bosnia and Herzegovina leh Hungary te goal awm loin an inhnehtawk a, match hnih khelhah Germany leh Netherlands-in point li ve ve hmuin table chungah an awm.

Striker an thlak

Germany leh Netherlands ten Nations League inelna ni mah se chak tumin player an rem a tih theih a, team pahnihin striker chauh an thlak. Julian Nagelsmann-a'n Niclas Füllkrug aiah Stuttgart striker Deniz Undav a luhtir a, kum 28 mi Undav hi ram tana vawi li a khelhna chauh a ni.

Ronald Koeman-a'n Bosnia laka goal hmahruai khungtu Joshua Zirkzee chu bench-ah dahin kum 22 mi Brian Brobbey chu a luhtir a, Ajax striker hi ram tan vawi thum a inlanna a ni thung.

Attacking football

Johan Cruyff Arena, Amsterdam-ah inkhel nung tak chhawpchhuah a ni a, minute hnihna lekah goalkeeper Bart Verbruggen ball vawrhchhuah chu Brobbey-a'n a awm hmangin Ryan Gravenberch tana pet nuam turin a siamsak a, Liverpool midfielder hian through ball ṭha zet a pet nghal. Germany tlarhnung chiang taka ṭhiah a ni a, ball um luttu Tijjani Reijnders-a'n keeper Marc-André ter Stegen kap karah a khung.

Goal dang luh belh lawk lo mah se goal chance hmuh tur a tam hle. Florian Wirtz-a'n Oranje tlarhnung a rum ṭhaih ve nghal a, Kai Havertz pawhin goal chance a nei ve thung. Mahse, mualneitu lamin chance a nei ṭha zawk a, Xavi Simons-a freekick ṭha zet chu Denzel Dumfries-a'n goal zawnah a tauh thei lo.

Germany tlarhnung a pawp chhunzawm a, Gravenberch-a ball vawrh luh tho chu Simons-a'n keeper Ter Stegen chauh a hmachhawn hnuah a ti goal thei lo. Minute 38-naah Germany-in si phurh an sut a, Wirtz-a ball pet chu keeper Verbruggen-a'n dang mah se a per chu Undav-a'n a khung. Germany-a piang, Turkish thisen kai tan international football-a goal hmasa ber a ni.

A hmuhnawm zel

Hliam vangin Nathan Ake zawnchhuah a ngai a, Manchester City lam tan hriat a nuam lo ang. First half tawp hmain Germany-in hma an hruai a, Robert Andrich-a ball vawrh luh chu David Raum-a'n hmun hlauhawm laiah dah lut nghalin captain Joshua Kimmich-a'n a khung.

Germany-in first half khar ṭha mah se Netherlands bawkin second half bul an ṭan ṭha. Brobbey tharum chu danglamna thlentu a ni a, Ajax striker hian a chakna hmanga hmun awl a insiam hnuah a cross chu Dumfries-a'n goal ruakah a khung. Minute 50-naah 2-2 a ni.

Inkhel a nung chhunzawm a, goal hmaah Havertz a vannei lo - Arsenal forward hian goal ruakah a khung lo. Gravenberch-a'n a ball thiamna a pholang chhunzawm a, hla tak aṭanga a ball pet chu keeper Ter Stegen-a'n a dansak. Hun tawp thlengin inkhel a nung a, goal dang luh belh loin 2-2 in an inhnehtawk.