US coach thar Pochettino

FIFA World Cup 2026 thlengtu tur United States chuan coach atan Mauricio Pochettino an la lut a, Tottenham leh Chelsea manager hlui hian Gregg Berhalter a thlak ang. US hian Argentine manager an lakluh thu hi New Zealand nen friendly match an khelh hmain an puang a, nimin zing inkhelah hian 1-1 in an inhnehtawk.

Chona thar

Tottenham Hotspur, PSG leh Chelsea enkawl tawhtu Pochettino tan chona thar a ni a, kum 52 mi Poch chuan, "Hun ṭha hi ka bawhpelh phal lo. Football vang chauhin thutlukna ka siam lo a, football-a hmasawn duhin tumna an nei a, an thawkrim a, an rilṭam a; hei hian phurna nasa tak min pe a ni," tiin a sawi.

Player chungchang sawiin Poch chuan, "Player zingah theihna nei sang tak tak ka hmu a, kan vaia kan thawh ho ṭha chuan ram mipui chhuantham hlawhtlinna kan nei theiin ka hria," tiin beseina a neih san thu a sawi.

Pochettino hi a inkhelh hun laiin defender a ni a; club ṭha Newell's Old Boys, Espanyol, Bordeaux leh PSG tan te a khel tawh. Player anga a hun tawp hmanna Espanyol-ah manager hna thawk ṭanin Southampton-ah hming a chher a, Tottenham-ah hriat a hlawh. Spurs aṭanga a chhuah hnuin PSG a enkawl a, Chelsea a zawm leh bawk.

Argentine manager hi Spurs a enkawl laiin fak hlawh viau mah se nomawi a chawi theih loh avangin sawisel a hlawh a, a club hnuhnung pahnih PSG leh Chelsea-ah ban a tawk ve ve. French club a enkawl laiin Ligue 1, Coupe de France leh Trophée des Champions-ah te nomawi a chawi a, a record hi chhe lo mah se a enkawl hi PSG a nih miau avangin a nomawi vangin fak a hlawh phah lo.

US team chu

United States hian kum 1994-a FIFA World Cup an thlen hnuah nasa takin hma an sawn a, ram hausa an nih vangin football ram liante tan pawh tum châkawm loh an ni pha. World Cup 2002-ah quarterfinal hial thleng mah se last 16 bak an thleng thei tawh lo a, World Cup 2018-ah phei chuan an inpettling zo lo.

CONCACAF Gold Gup-ah erawh United States hi team ṭha zinga mi an ni reng a, kum 2021 khan champion mah se nikum khan semifinal-ah an tla. Inelna lian tham an hmachhawn hnuhnung ber chu Copa America a ni a; Bolivia hnehin bul ṭan mah se Panama leh Uruguay te an hneh loh avangin group stage an patlang zo lo.

Copa America-a an chet ṭhat loh avangin coach Gregg Berhalter an ban a, tun ṭum international break-ah hian Under 20 team enkawltu Mikey Vargas-a'n a ho. US hian Canada 2-1 in an hneh lo a, New Zelaand nen 1-1 a inhnehtawk bawk avangin insiamṭhat an mamawh hle.

October 13, 2024 hian US-in friendly match-ah Panama an hmachhawn ang a, coach thar Mauricio Pochettino-a'n a hna a ṭan ang. United States hi FIFA ranking-ah 16-na an ni mek a, Poch-a tana pawimawh ber chu FIFA World Cup 2026 a ni dawn a, team thar din theihna hun ṭha a la awm.