MPL11-ah semifinal khel tur hriatthiam a la har

LZ Juice MPL11-ah round 9 khelh zawh a ni tawh a, semfinal khel tur hriatthiam la har hle. Inelna ṭantirh aṭanga la tel vek Chanmari FC leh Aizawl FC te chu semifinal khel ngei tura ngaih an ni tawh a, team dang paruk tan semifinal kawng a la inhawng vek.

Mizoram Police, SYS FC, Sihphir Venghlun, Ramhlun Athletic, Chawnpui FC leh FC Bethlehem ten hmun ruak pahnih hi an inchuh dawn. Match nga khelh tur la awm hi a pawimawh dawn hle.

Police nge nge

Mizoram Police-in I Day Football an champion hnuah kawng dik zawhah inngai mah se FC Bethlehem laka point ruk hmuh theih tur aṭanga point khat chauh an hmuh avangin an dinhmun a derthawng hman.

MPL champion lai hi dinhmun harsa aṭangin an tho chhuak a, match hnuhnung berah Chawnpui FC an hneh a, thawk lakna hun an neiah a ngaih theih. Mahse, Police hian round 10-ah Aizawl FC an hmachhawn lehnghal dawn a, I Day Football final rematch a nih avangin en a châkawm hle.

Aizawl FC hian league champion nih an duh avangin Police hneh an duh dawn a, chu chauh ni loin I Day Football final phuba lak an châk zek zek tawh ang. Police hian I League club hi an hneh lo a nih chuan thawk lakna hun a zo ang a, dinhmun derthawng aṭanga bul ṭan ṭhat leh a ṭul ang.

SYS FC hun a inṭan?

Naupang ṭha rual awm khawmna SYS FC hi inelna ṭantirh lamah che ṭha mah se season laihawlah an talbuai a, fixtures harsat vang a ni tel bawk. Lunglei club hian round 4-ah Bethlehem nen an inhnehtawk hnuin a zawn zatin match li an chak lo a, table-ah pawh a sang pali zinga tel pha kha paruknaah an tla thla hial.

Mahse, SYS hian match hnuhnung berah Bethlehem hnehin a sang paliah an invawrh chho leh tawh a, round 10-a an elpui Ramhlun Athletic nena an inkhel tur hian an hmalam hun thui tak a hril dawn. Lalmuankima hote hian Ramhlun an hneh thei a nih chuan a sang pali zingah an dinhmun an sawhnghet chho thei ang.

Sihphir Venghlun & Ramhlun Athletic

Sihphir Venghlun leh Ramhlun Athletic ten point 10 ve ve an hmu tawh a, team pahnih hi hriatthiam an har hle. An khelh ṭhat ṭumin eng team pawh el thei tura ṭha ni mah se boruak sang tak tak an zo lo a, MPL vawi khatna a ni bawk nen, duap chang an ngah.

Chutihrualin I Day Football thlir kir chuan Ramhlun Athletic-in semifinal an lut a, MPL-ah pawh Danny Lalduhawma hote hi semifinal luh beiseiawm zinga mi an ni. Mahse, knockout stage lut tur chuan tlarhnung an tihphui ṭhat a ṭul ang.

Sihphir Venghlun an danglam tam lo a, an khelh fuh loh ṭumah goal an chhuah leh ṭeuh ṭhin a, Ramhlun nen hian goal 24 ve ve an chhuah tawh. Mahse, Ramhlun aiin head to head-ah an ṭha zawk a, round 14 khelh zawhah an point a la inang a nih chuan an dinhmun a ṭha zawk dawn.

Chawnpui leh Bethlehem

Chawnpui FC-in result ṭha duhin Lalrindika Hmar an la kir a, match hmasa berah chak nghal mah se match hnuhnung berah Mizoram Police lakah an tlawm. Bethlehem pawhin Police lakah point li sual chhuak mah se an elpui SYS FC an hneh lo.

Chawnpui leh Bethlehem te hi round hnuhnung bera an chetsual ve ve avangin semifinal kalkawng a bumboh chho a, an pahnih tan hi chuan semifinal kawng a inhawng tawh loah a ngaih theih. Chutihrualin pakhat zawk tan chuan semifinal kawng inhawn dan a awm ang.

Round 10-ah Chawnpui leh Bethlehem te hi an inkhel dawn a, hei hian an hma lam hun a hril dawn. A chak zawk chu semifinal khel tur zawnnaah an tel chhunzawm ang a, chak lo zawk tan erawh semifinal khelh phak a harsa ang. A bik takin point nga chiah la hmu Bethlehem tan an elpui Chawnpui hneh hi a pawimawh a, semifinal khel tur zawnna ni loin relegation battle tih pawhin a sawi theih ang.