Premier League: Big Six-ten eng nge an tih?

European football-a league 'hot' ber tih loh rual loh Premier League chu khelh ṭan a ni leh ta a, league match thum khelh a ni tawh - international break hman mek a nih avangin kar tawpah inkhel a awm lo a, khua a har nghal deuh ruih!

Manchester City-in nipui transfer-ah player langsar lei ruih ruih lo mah se, Premier League-a champion tura rin kai ber pawl an la ni reng - khelmualah kan rin sual lohzia an pholang a, match thum an khelh tawhah an chak vek.

Liverpool an ṭha tih hi chu kan hriat sa a ni a, mahse, Jurgen Klopp ber a chhuah miau avangin an awm dan tur rin lawk a harsa. Rin loh takin coach thar Arne Slot a tal hiar nghal a, match thumah an chak vek - City nen 100% record nei an ni mek.

Premier League-a club langsar zual paruk, 'Big Six' tia hminglem an pek ṭhinten, eng chin nge an thlen dawn tih hriat a châkawm zual sawt a, match thum aṭanga buk lung khai nghal ngawt tur ni lo mah se, an ruang am tur chu a hriat theih, tiin sawi ila, kan sawi sual lo ang - September 14, Inrinni zanah Premier League hi khelh ṭan leh chauh tur a ni.

City ropuina Haaland

Chelsea, Ipswich Town leh West Ham chu City hmaa ding tawh an ni a, Pep Guardiola naute hian an lo hneh vek - chuta langsar ber tih ngam chu Erling Haaland a ni a, Norwegian striker hi goal khung châkin a tuihal reng em ni chu aw, tih mai tur a ni.

Match thumah Haaland hian goal sarih a khung der tawh a, match hnih a zawnin hattrick a siam. Kum hnih liam ta maiah khan City hi zawm ve chauh mah se, league match 69-ah goal 70 a khung der tawh a, tun season-ah goal 100 a khung tling lo ang, tih a sawi theih loh.

City hian khawvela league harsa ber ang hiala sawi Premier League an thunun viau a, a zawnin vawi li an champion tawh! Tun season-ah a zawna vawi nga champion thei dinhmunah an ding mek a, nomawi chawi tura rin hlawh ber an ni mek.

Hei hi hriat tel a ngai - midfielder pawimawh Rodri chu tun season-ah a la inlan rih lo a, Spanish midfielder ang thoa Euro khel chau John Stones, Phil Foden leh Kyle Walker te pawh vawi khat chiah an la inlan!

Beiseina khumtu Slot

Coach ngainatawm leh hlawhtling a ni a, Jurgen Klopp thlak hi a namai lo. Mahse, Arne Slot-a'n German coach ngai lo turin Liverpool fan-te a la siam 'rih' a, league match thum an khelh tawhah hnehna a chanpui vek - an khel a hmuhnawm tel.

Reds hian Ipswich Town, Brentford leh Manchester United hmachhawn tawhin an hneh vek a, goal sarih an khung a, an lamah a lut lo. Hmelma kumhlun United hi 3-0 in an sawp thei a, Old Trafford-ah kher an chak bawk avangin Reds fans an hlim.

Slot-a'n Liverpool manager awm tawh zinga goal chhuah miah loa league match hmasa pathum chak thei awmchhun record a siam a, Dutch coach hian a ngaihtuahna a hmang sual thut a nih loh chuan Reds hma hun a êng hle.

Coach thlak avanga champion sawi ri ngam lo hian champion an sawi ri ta a, ṭum dang ang thoin Mohamed Salah a ṭangkai. Egyptian forward hian league match thum an khelhah goal a khung vek a, goal thum leh assist pathum a nei leh der tawh.

Striker mamawh lo Arsenal

Arsenal-in nipui transfer-ah number 9 an la lut lo a, season hmasaa pahnihna hian champion tura an player mamawh an la loah tam takin an ngai - mahse, hetih lai taka lo lang chu Kai Havertz a ni.

German forward hi number 9 ni lo mah se, Mikel Arteta-a'n ring tawkin tlarhmaah a tlat tir a, league match thum chinah chuan a pu lawmna a la thlen rih - goal hnih a khung tawh a, khelmualah team tan a ṭangkai viau zel bawk.

Havertz hian striker hna a chelhin match 15-ah goal 10 a khung thei a, Spanish coach Arteta-a'n a ring lui hi a awm lo hran lo. Mahse, champion tum Arsenal hian point hnih an hloh der tawh a, City leh Liverpool an awm ve avangin thu hriat nuam a ni lo ang.

Arsenal hian season hmasa an champion-na kawng daltu langsar Aston Villa chu khualmualah 2-0 in an hneh a, hemi hma hian Wolverhampton Wanderers chu 2-0 in an hneh bawk. Mahse, international break hmaa an match hnuhnung berah Brighton & Hove Albion chu 1-1 in an inhnehtawkpui.

Tottenham an hriam lo

Season hmasa kha Tottenham Hotspur-in season bul an ṭan ṭha hle - an league match hmasa 10-ah vawi riat an chak a, vawi hnih an khingpui draw-in, table chung ber an luah. Mahse, season tawp lamah an zuih ral a, an match hnuhnung pasarihah vawi nga an tlawm.

October vela champion sawi ri team kha, season a tawp meuh chuan pangana an ni hram a, Champions League pawh an khel phak lo - a chhan bulpui ber chu Harry Kane thlaktu an nei lo chu a ni a, an chance neihte goal-a chantir an harsat.

An buaina chingfel turin Dominic Solanke chu Bournemouth aṭangin pound maktaduai 65-in an la lut a, mahse, English striker hi an match hmasa berah a inhliam nghal - tun dinhmunah chuan nghakhlel taka Solanke lo kir hun thlir chu an tih theih a ni.

Ange Postecoglou enkawl team hian league match thum aṭangin point li chiah an la hmu a, Foxes (1-1) an draw hnuah Everton (4-0) sawp mah se, Newcastle United (2-1) an ngam lo zui a, international break zawha an hmachhawn hmasak ber tur chu Arsenal an ni - champion chu sawi loh, Champions League an khelh phak chuan an lawm ang.

Chelsea - an indin mek!

Nipui transfer-ah Chelsea bawkin thawm an nei a, player 10 ngawt an la lut! Player heti zat lei nan hian London club hian £203mtd an seng a, player 12 zet an chhuahtir ve tho tih erawh hriat tel a ṭha - £150mtd an la lut ve thung tihna a ni.

Season hmasa khan Chelsea-in indinthar chungchang an sawi a, an indin fel dawn chauh emaw tih laiin coach Mauricio Pochettino nen inhriatthiam tawnnain an inṭhen leh a, Championship-a Leicester champion puitu Enzo Maresca an la lut.

Marseca-a'n system thar tuh tumin, Chelsea team hmuhnawm zawk siam a tum a, league match thumah chuan hun a la mamawh rei dawn tih a lang. Player naupang an tam miau a, hotêa chance hlah a tam a, tlarhnung lamah tihsual hmuh tur a awm fo bawk.

London club hi league match thumah vawi khat chiah an la chak a, Manchester City (2-0) lakah tlawmin, Crystal Palace (1-1) an inhnehtawkpui a, Wolverhampton Wanderers lakah goal ruk khung mah se, goal hnih an chhuah ve avangin hna a la tam tih a lang - champion sawi rik chi a ni lo a, Champions League an khelh phak chuan season ṭha a ni ang.

United - Beiseina beidawnthlak

Manchester United-in an league match hmasa berah 1-0 in Fulham an hneh nghal a, an pawr viau dawn a, an zal leh hma hle - Brighton & Hove Albion lakah 2-1 in an tlawm zui a, insiamṭha loin Liverpool lakah 3-0 in an mualpho.

Real Madrid player langsar ni phak Casemiro chu Manchester United-ah erawh player uai thla lam a ni a, Liverpool lakah a tihsual vangin goal hnih an chhuah - £50.5mtd man Manuel Ugarte-a'n midfield-a an buaina a chinfel an beisei ang.

Striker Rasmus Hojlund leh left back Luke Shaw te hliam vangin an la chawl a, £52mtd-a lakluh thar, defender Leny Yoro a inhliam zui a, player thar Matthijs de Ligt, Noussair Mazraoui leh Joshua Zirkzee ten insiamrem turin hun an la mamawh bawk.

Chutihrual chuan United-in hun an mamawh chhungin an elpui club-te erawh an kal fawr zel a, Marcus Rashford-a'n a hlawh tam ang ngeia a khelhchhuah a hun - 'nge Erik ten Hag-a hnuaiah hi chuan league nomawi beisei rih lo se, a fuh zawk - kan ti dawn? Hunin a hril ang.