Luton Town-ah Victor Moses

Premier League aṭanga tla thla Luton Town chuan Chelsea wing-back hlui Victor Moses an la lut a, kum 33 mi hian engtianga rei nge contract a ziah tarlan a ni lo.

Nigeria tan vawi 38 inlana goal 12 khungtu Moses hian Russian Premier League club Spartak Moscow-ah a contract a hmang zo tawh a, contract thar a ziah loh avangin club nei loin a awm reng.

A tawpah Luton Town an lo lang a, Championship lama khel turin an seng lut. Luton boss Rob Edwards chuan, "Kan team-a inelna ṭha zawk thlen thei tur khawp player niah kan ngai a ni," a ti a, Moses an lakluh chhan a sawi.

Crystal Palace aṭanga a professional zinkawng zawh ṭantu Moses hian Premier League-ah pawh sulhnu a lo nei nual tawh. Palace tana a khelh lai hi Championship club an nih lai ni mah se, kum 2010 khan khatihlaia Premier League club Wigan Athletic a zawm.

Wigan tan match 80 khela goal kua a khung hnuah, kum 2012 khan Chelsea a zawm. Blues-ah hian 2019 thleng cham mah se, Liverpool, Stoke City, West Ham, Fenerbahce, Inter Milan leh Spartak Moscow-ah te loan-in an kal tir.

Kum 2021 khan Russian club hi a nghetin a zawm a, tunah chuan Luton player a ni ve leh dawn ta thung. Chelsea tana Premier League, Europa League leh FA Cup nomawi chawitu Moses chuan, "European club tam tak aṭangin sawmna ka hmu nual a, mahse, ka agent hnenah he hmuna khelh hi ka duh thu ka sawi a ni.

"A nuam thei ang bera inkhelh ka duh a, he club leh team tan theihtawp chhuah a, Premier League-a hruai kir leh ngei ka duh a ni," a ti a, English top flight league-a Luton kirpui leh a tum.