Modric-a'n chawlh hun tur sawi thei lo

Real Madrid captain Luka Modric chuan a chawlh hun tur a la sawi chian theih loh thu a sawi a, inkhelh nuam a tih loh hun hun chu a boot a khai hun tur a nih thu a sawi chhuak.

Modric chuan, "Ka chawlh hun tur hi chu sawi theih a ni lo - hma hun sawi a harsa a, inkhel zel phawt ila, a hriat mai ang. Inkhel zel tura thathona ka neih tawh loh hunah football chu ka chawlhsan ang," a ti.

September 9, Thawhṭanni khan Modric hian kum 39 a tling chiah a, a kum zat ngaihtuah chuan a khel rei tawh hle - Real-ah hian kum khat contract a la nei a, Real-ah Eduardo Camavinga, Aurelien Tchouameni, Fede Valverde leh Jude Bellingham te an awm avangin a vanglai anga player pawimawh erawh a ni phak tawh lo.

Kum 2018-a Ballon d'Or dawngtu Modric hian ram tan pawh goal a la khung zel a, September 8, Pathianni zan khan Poland nena an inkhelah freekick aṭangin mawi zetin a khung - ram tan match 180 khelin goal 27 a khung tawh.

Modric chuan, "Hun rei tak hnuah freekick aṭanga goal ka khung ve lehte kha ka lawm hle. National team tana match 180 ka khel thei hi ka lawm a, hetiang zat khel tur hian ka inbeisei ngam lo.

"Ram tana inkhelh hrim hrim hi duhthusam chu a ni mai a, match 180 chu ka suangtuah phak lo. Kan ram tana koh theiha ka awm a, ka pui ve thei hi ka lawm a ni," a ti a, an ram team hi World Cup 2018-ah final luhpuiin, kum 2022 khan pathumna an ni bawk.