Premier League Transfer Pound maktaduai 30 eng tham a ni ta lo!

Kum 2000 hmalama Premier League player zinga manto ber chu Alan Shearer a ni. Blackburn Rovers champion puitu striker Shearer hian Manchester United sawmna hnawlin July 1996 khan pound maktaduai 15-in Newcastle United a zawm. Hei hi a hunlaia English player chauh ni loin Premier League player manto ber a ni a, kumin nipui bazarah erawh Shearer man ang zat hian Bournemouth-in Liverpool tana khel pha lo Jordan Ibe an lalut.

Television aṭanga club-in sum ṭhahnem tak an hmuh avang te, club neitu leh sum peipun thiamten football atana pawisa ṭhahnem tak an dah kham avangin player man hi nasa takin a sang chak tih a lang reng a, pound maktaduai 30-in a lei theih hi player ṭha tak ni mah se tun hmaa player ṭha bik ang kha an ni tawh lo.

Nikum nipui bazarah khan Premier League club-in player lakluh nan pound maktaduai 822.5 an seng a, Manchester United-in transfer record thar siama Paul Pogba te an lalut chho a nih phei chuan English club-te sum sen hi tluklehdingawn khat a tling chho hialin an ring.

Kum 15 liam ta khan

Manchester United manager Sir Alex Ferguson-a'n hma thlir thui tak neiin player lei nan sum ṭhahnem tak a theh chhuak ngam. Roy Keane (Nottingham Forest - 19/07/1993, £3.75million), Andy Cole (Newcastle United - 12/01/1995, £6million + Keith Gillespie), Jaap Stam (PSV Eindhoven - 01/07/1998, £10.75million) leh Dwight Yorke (Aston Villa - 20/08/1998, £12.6million) lei ngamtu Scottish manager chuan July 1, 2001-ah PSV Eindhoven aṭangin Ruud van Nistelrooy chu pound maktaduai 19 in an lalut a, British record fee a ni.

Red Devils hian ni 20 hnuah Lazio aṭangin Juan Sebastian Veron chu Lazio aṭangin pound maktaduai 28.1 in lalut lehin an record siam chu an khum leh nghal. Premier League manager zinga hlawhtling ber Sir Alex hian kum 2002-ah Rio Ferdinand chu Leeds United aṭangin pound maktaduai 29.1 in an lalut a, English defender hi che-
ṭha zuiin a hnua United-in an pek belh nen chuan a man hi pound maktaduai 34-ah kai chhoin British record a siam bakah khawvela defender manto ber a ni.

Ferdinand hmaa defender man-to ber chu Lilian Thuram a ni a, French defender hian kum 2001 khan Parma aṭangin Juventus chu pound maktaduai 32.8 in an lalut. Kum 15 liamta khan Manchester United hian sum hmang huai viau tawh mah se khawvel huap chuan tluk loh an la ngah hle. Real Madrid chuan kum 2001 khan pound maktaduai 46.6-in FIFA World Cup leh Euro-a France champion puitu Zinedine Zidane chu Juventus aṭangin an lalut. France legend man hi Argentine midfielder Veron-a man te nen chuan a la inthlau hle.

Kum 10 liam ta

Kum 2003-ah Russian pa hausa Roman Abramovich-a'n Chelsea leiin sum hmang tam mah se player manto fal nalh erawh a lalut lawk lo. Blues hian kum 2006-ah Andriy Shevchenko chu AC Milan aṭangin pound maktaduai 30.8 in an lalut a, an man punna tiam lo chuan British record thar a ni.

Chelsea hi neitu thar zarah Man-chester United leh Arsenal te huangah an inhlang chho a, kum 2008-ah Arab sumdawng hausain Manchester City leiin Real Madrid aṭangin Robinho chu pound maktaduai 32.5 a lalutin British record thar an siam nghal. Thla 12 hnuah City hian Carlos Tevez chu pound maktaduai 47.5 in lalut leh a, Premier League club-te sum hman danin ngai a awh leh tawh lo a, a pung chho char char tawh.

Kum nga liam ta

Premier League club-ten sum hmang hnem chho mah se kum nga liam ta kha chuan pound 30 man player hi la awm meuh chuang lo, a kai pha chin chu player ṭha bik an ni. Arsenal midfielder Cesc Fabregas chu a chawr chhuahna Barcelona-in pound maktaduai 38 in an la let a, hetiang zat vel bawk hian Manchester City-in Sergio Aguero chu Atletico Madrid
aṭangin an an lalut bawk.

Liverpool-a che ropui Fernando Torres chuan pound maktaduai 50-in Chelsea a pan a, English record a ni. Player ropui zingah player naran Andy Carroll chu Newcastle United aṭangin Reds-in pound maktaduai 35 in an lalut a, Liverpool hi Spanish striker chhuah vangin an talbuaiah a ngaih theih. Hriat tel ṭul erawh Liverpool tho hian Luis Suarez chu Ajax aṭangin pound maktaduai 22.8 in an lalut a, hei aia fuh a awm bik chuang lo.

Nikum lam...

Sum hmang tam ngam lo Arsenal pawhin Mesut Ozil (2013) leh Alexis Sánchez (2014) te lalutin an zia an thlak chho a, hetihlai hian club tenaua ngaih Stoke City leh Crystal Palace te pawhin sum an hmang huai chho viau bawk. Nikum nipui bazarah Manchester City-in player pathum Nicolas Otamendi, Raheem Sterling leh Kevin De Bruyne te lakluh nan pound maktaduai 134 an seng a, Monaco aṭangin Anthony Martial lakluh nan Manchester United-in pound maktaduai 36 an hmang a, a hun laiin to viauin lang mah se a khelh dan thlirin a to hran lo.

Lei fuh thei lo zingah Liverpool bawk an langsar a, Aston Villa aṭangin Christian Benteke chuan pound maktaduai 32.5 in Anfield a pan a, Belgian striker hian khelhna a hmun a chang meuh lo.

Kumin transfer

Kuminah pound maktaduai 30 bawr vela an lei player-te chu Sadio Mane, Granit Xhaka, Eric Bailly, Michy Batshuayi leh N’Golo Kante te an ni. Kum 15 liam ta leh kumina pound maktaduai 30 man player-te an inthlau a, chutihrualin leifuh bik erawh an awm thei bawk.

Khawvel player manto zinga tel pha Gareth Bale, Cristiano Ronaldo leh Luiz Suarez te hi Premier League-a an chetṭhat vanga manto zui ta an ni.