German-ah Marquez ropui chhunzawm

Marc Marquez chuan Ger-man MotoGP-ah rider ṭha bik a nih zia a pholang leh a, a zawna a vawi li nan hnehna changin championship-ah a dinhmun a sawh nghet chhunzawm zel bawk- champion lai Jorge Lorenzo lakah point 48 zetin hma a hruai fal ta!

Sachsenring tlankawngah intlansiak ṭan hmain ruah a sur a, kawng huhah chetsual a hlauhawm avangin an fimkur tlang hle. Pole position aṭanga bul ṭan Marquez pawhin beisei angin bul a ṭan ṭha lo - Spanish rider hi panganaah a tawlh hnung hman. Honda chet fuh loh laiin Andrea Dovizioso leh Valentino Rossi te erawh a hma lamah an tlan thung.

MotoGP world champion vawi hnih ni tawh Marquez-a'n a theihna lantirin intlansaik a zawh meuh chuan Cal Crutchlow hmaah 9.857 in a tlan fal leh hman a, Ducati rider Dovizioso chu pathumna niin Rossi chu pariatnaah a lungawi a ṭul bawk. Yamaha rider Lorenzo chu 15-naah thlengin point khat chiah a hmuh belh.

Kum 23-a upa Marquez chuan, "A hmasa ber aṭanga bul-ṭan ni mah ila kawng a huh avangin khan fimkhur a ngai a, kawng kawi pariatnaah ka chesul ṭep bawk. Khua a rawn
ṭhat a, kawng a ro ṭan kha chuan ka theihna lantirna hun a ni tih hriain ka theihtawp ka chhuah chhunzawm a, a tawpah ka dingchang leh a ni," tiin a sawi.

Tun season intlansiak hma-bak vawi kua la awm aṭangin Marquez hian point 170 hmuin Lorenzo (122) lakah hma a hruai zel a, point 111 hmutu Rossi chu pathumna a la nih chhunzawm zel. August 14 khian Austrian Grand Prix an tlan leh ang.

German MotoGP Result

1 Marc Marquez Spa Honda 47m 03.239s

2 Cal Crutchlow Gbt Honda +9.857

3 Andrea Dovizioso Ita Ducati +11.613

4 Scott Redding Gbt Ducati +11.992

5 Andrea Iannone Ita Ducati +22.755

6 Dani Pedrosa Spa Honda +25.920

7 Jack Miller Aus Honda +26.043

8 Valentino Rossi Ita Yamaha +26.449

9 Hector Barbera Spa Ducati +26.614

10 Alvaro Bautista Spa Aprilia +31.274