Ronaldo-a'n Rangers a zawm teuh

Brazilian player ropui Ronaldo agent Giovanni Branchini chuan thawnthu hlui sawi chhuakin Barcelona striker hlui hian kum 1997 khan Scottish club lian Glasgow Rangers a zawm ṭep thu a sawi.

Kum 1996-97 season khan Ronaldo hi Barcelona tan a khel a, season duhawm tak hmangin vawi 49 a inlanah goal 47 a khung sak. Season tawp rualin a hunlaia club langsar rual Inter Milan, Lazio leh Rangers-te hian an hnena khel turin an rim nghal.

Giovanni Branchini chuan kum 20 leka upa nichunga FIFA World Player of the Year naupang ber ni thei a striker chungchang hi sawiin, "A hunlaia Ronaldo lei theihna zat kha club tam tak tan chuan a tam lutuk mah mah a, amah lakluh duh tak taka dawr ngam chu Inter, Lazio leh Rangers chiah an ni," a ti.

Branchini chuan sawi chhun-zawmin, "Glasgow Rangers aṭanga sawmna a hmuh kha chu a itawm thlawt. Scottish league-ah a inlan kher a ṭul lo a, Champions League nomawi chawi an duh em avangin European match chiah an khelhtir tur thu an sawi a ni. Mahse, Inter khan Brazil a-ṭangin Ronaldo hi an lo enthla tawh a, a man zat ngam hmasa ber an nih bawk avangin a pan ta zawk a ni," tiin a striker thawnthu hlui a sawi chhuak.

Brazil tan vawi 98 inlana goal 62 khungtu striker hian Inter Milan a zawm hian a man zat hi pound maktaduai 18.87 a ni a, a hunlaia khawvel player manto ber a ni.