Vardy nen kan in ang - Musa

Leicester City striker thar Ahmed Musa chuan a striking partner tur Jamie Vardy nen an khelh dan a in ang thu a sawi a, English striker nen an thawhrimna leh tlan chakna chu a khaikhin.

Nigeria international hian CSKA Moscow aṭangin Premier League champion team hi pound maktaduai 16.6-in a zawm a, Foxes club chanchina an player manto ber a ni.

Season hman zawh taka Russian league-a goal 13 khungtu striker chuan, "Kum 10-12 inkarah kha chuan goal ka veng ṭhin a, striker ni tura ka rilru ka lo siam kha ka ti fuh hle. A tirah harsa ka ti a, mi tam takin striker ni tura ka tet thu an sawi ṭhin," a ti.

Musa chuan sawi chhunzawmin, "Ka tet thu hrilh ka nih apiangin ka pumraw len leh len lohin awmzia a neih loh thu ka sawi ṭhin. Jamie Vardy nen hian kan in angin ka hria. Ka tlan chak a, rim takin ka thawk ṭhin a, in anna kan ngah em em a ni. Vardy nen inkhelh dun ka chak a, kan inkawp rem theih ka beisei," tiin a hmalam hun a thlir.

Kum 23-a upa striker chuan Foxes-ah a tlangnel nghal thu sawiin, "Training kan neih hmasak ber chuan mak ka ti zawk a, Russia aiin engkim a hautak a, a harsa zawk a ni. Kan training dan a harsa em em a, mah se kei chuan heivang hian Leicester City hi league-ah an champion-ah ka ngai," tiin a club thar chu a fak hle.