Dortmund huphurhtu Lahm

Borussia Dortmund chuan an player ṭha chan nual tawh mah se season tharah team ṭha leh hlauhawm an nih tur thu Bayern Munich captain Philipp Lahm-a'n a sawi chhuak.

Tun nipui transfer chhungin Dortmund hian an captain leh defender rinrawl ni bawk Mats Hummels chu an elpui Bayern lakah an chân tawh a, playmaker pahnih Ilkay Gundogan leh Henrikh Mkhitaryan te chu Premier League club lian Manchester City leh United lakah an chân tawh bawk.

Hei mai bakah hian striker chhunvawr Pierre-Emerick Auba-meyang chu Europe club lian dangte chil ti puttu a ni mek bawk. Mahse, Thomas Tuchel hian rawlthar beiseiawm tak tak Ousmane Dembele leh Emre Mor te bakah Euro 2016 champion team a mi Raphael Guerreiro a nei - an player hlui Mario Gotze chu Bayern aṭangin an la let dawn niin thuthang a awm mek bawk.

Germany international hlui Lahm chuan, "Thomas Tuchel hi coach ṭha tak a ni a, a kaihhruaina hnuaiah Dortmund hian khelhdan phung ṭha tak an nei. Player langsar chhuah tir mah se an hmunruak luahkhat tur chu an nei zel ang. Team ṭha tak indin tawh an nih avangin kan elpui hahtak tur chu anni hi an ni," tiin season hmasa Bun-desliga pahnihna team a dah hniam lo hle.

Manager Pep Guar-diola chhuak mah se Carlo Ancelotti an neih avangin Bayern captain hi a zam chuang lo, "Manager thar hnuaiah chuan kalphung thar a ni zel a, tunah pawh hian hma kan sawm zel ka beisei. Champions League khel tur kan nih avangin a ṭha satliah zinga tel a tawk lo a, a ṭha ber ni tura inbuatsaih zel a pawimawh. Kum tinin champion kan tum ziah a, chumi tur chuan chawlhkar tin hi a pawimawh vek," tiin league leh Europe-a hlawhlting tur chuan inbuatsaihna neih ṭhat a pawimawh thu a sawi.