Kar ruk chawl tur Robben

Bayern Munich winger Arjen Robben chu a malpui tihrawl na vangin kar ruk chhung a inkhel thei dawn lo a, Bundesliga season tirah a hmel kan hmu lo mai thei.

Kum 32-a upa Robben hi season hmasa khan hliam vangin a inkhel tam lo a, league-ah match 15 chiah inlanin season tawp lamah thla hnih chhung khan tuna a natna ang tho vang hian a lo buai tawh bawk.

Inrinni zan khan Bayern hian season thar inbuatsaih nan German fifth division club SV Lippstadt 4-3 in an hneh a, he inkhelah hian Netherlands international hian goal khat khung mah se minute 36-naah hliam vanga lakchhuah a ni.

Bayern Munich chuan an player hliam chungchangah thuchhuah siamin, "Robben malpui dinglam na enfiah a ni a, a rei lo berah kar ruk chhung tal a chawlh a ngai ang," an ti.

Chelsea leh Real Madrid player hlui hi kar ruk a chawl a nih chuan Bayern-in season thar inbuatsaihna an neih zawhah a inlan thei dawn lo tihna a ni a, August 14-a Borussia Dortmund nen German Super Cup an khelh hunah leh Bundesliga match hmasa ber August 26-a Werder Bremen an hmachhawn hunah a inlan theih a beiseiawm lo tihna a ni.

A tlan chak leh ball thiam avanga hriat hlawh Robben hi hliam vangin a buai ngum hle a, German-ah season sarih hun a hman chhungin chawhrualin season tin league match 20 chauh khel ṭhin ang a ni.