Fiahna paltlangtu Liverpool

Liverpool in tunhnaiah a zawnin Premier League-a an khingpui lian pahnih Manchester United leh Arsenal an hneh lo a, Nilaini zanah erawh Championship club Blackburn Rovers chu khualmualah 1-0 a hnehin FA Cup semi-final an inhlangkai ta.

Ewood Park-a inkhelah hian rei tak goal a luh loh hnuin Liverpool tan Philippe Coutinho chuan minute 70 naah he inkhela goal awmchhun hi a khung a ni. Liverpool hian semi final-ah Aston Villa an tum ang.

Inkhel chu

Team pahnih hi Anfield-ah goal awm lo in an lo inhnehtawk tawh a, Ewood Park-ah chak zawk awm loh a thiang tawh lo. Liverpool in chak ngei tumin Blackburn Rovers an nawr tawm hneh hle. Reds tan Joe Allen chuan inkhel ṭan aṭanga minute li na lekah chance duhawm a nei a, mahse ho takin a pet goal lo. Liverpool players an langsar chhunzawm a, Glen Johnson, Philippe Coutinho leh tunhnaia Liverpool-a contract thar sign duh lo Raheem Sterling te'n Blackburn tlarhnung rum ṭhaih mah se Blackburn goalkeeper Simon Eastwood chet ṭhat zan an nang hlauh a, an pet goal thei lo.

Second half an khel a, Liverpool aiin mual neitu Blackburn Rovers an hlauhawm zawk. Tom Cairney leh Ben Marshall te'n chance duhawm rawn nei mah se mikhual keeper Simon Mignolet a chesual duh bik lo a, Liverpool a chhanhim.

Hun tawp nan minute 20 ala awm tihin khel ṭha zawk Liverpool in goal an khung ta nge nge a, kum 22-a upa Brazilian player Coutinho chuan a hun takah a team a rawn khaichhuak ta a ni. Match hnih chhung a zawna chak lo tawh Liverpool tan inkhel pawimawha chak result hlawhchhuah hi chanchin lawmawm a ni ang.

Hendo faktu Rodgers

Liverpool manager Brendan Rogers chuan Blackburn nen an inkhelh hma lawka a nupui-in nau a hrinsak Henderson a fak a, "Thawhlehni khan a nupui-in nau a hrinsak avangin team hotel-ah pawh a awm hman lo. Mahse, a hunah ṭha takin a nupui ava ṭawiawm a, inkhelh dawn­ah mut pawh mu mumal mang lo in a rawn kal leh nghal a ni. Captain awm dan tur dik tak in Hendo hi a awm a, a inpekna hi a ropui takzet a ni," tiin a fak.

Blackburn Rovers manager Gary Bowyer chuan, "Match hnih chhung Liverpool kan chhaih buai thei a, kan khel ṭha takzet a ni. Kan inkhelah khan penalty ni ngei tura ngaih pek kan ni lo a, kan vanduai a ni," a ti.