Mizoram Super League Khatla TBL inlan zan

Vawiin tlai leh zan­inah Samsung 3:16 Plan Solution Mizoram Super League inkhel hmuh tur a awm dawn a, Basketball ngainatu te tan mit a tlai leh dawn.

Tlai dar 4:00-ah team hmuhnawm Tui­kual South leh table mawngphaha awm mek Chaltlang Ryders an inkhel ang a, Khatla TBL leh Mission Veng Vikings te zan dar 8:00-ah an inkhel bawk ang.

Chak chhoh zel tum Tuikual South

Tuikual South in play-off katlangin Mizo­ram Super League an khel a, chenna ngai loh ramah Tuikual South hi team hmuhnawm ber pawl an ni thei. An game fimkhur tawk loh avangin chak ngei tura ngaih an nih hnuah an tlawm ṭhin a, Thawhlehni zan khan insiam ṭha in game boruak sang takah Vikings an hneh. Vawiin tlai dar 4:00-ah an khelh ṭhat an chhunzawm theih dawn leh dawn loh a hriat dawn e.

Tuikual South khing­pui tur Ryders tan chak ngei ngei a ngai tawh a, an chak lo leh a nih ngat chuan an tan table mawng chhuahsan a hrasa tawh dawn.

Eng nge an sawi?

Tuikual South coach K.C. Lalliantluanga chuan, "Ryders hi kan hu­phurh hran lo a, chesual ve thei tho kan nih avang erawh chuan fimkhur takin kan khel ang. Midang result a innghat kan nih avangin final luh inbeisei tawh lo mah ila kan game hmabak a chak chhoh zel kan tum dawn a ni," a ti.

KC-a chuan an player pawimawh Chp-a an chhawr theih loh maitheih tur thu sawiin, "Chp-a hi a nu thih cham a nih vangin a inlan thei lo maithei. Vawiin tlaia kan inkhel tur hi Chp-a nu hriatreng nan kan hlan a ni," a ti .

Chaltlang Ryders Asst. Coach Marc Lal­thlamuana Sailo chuan, "Tuikual South hi kan huphurh hran lo a, hneh ngei tumin kan khel dawn a ni. Tunah table mawng berah awm mah ila, in khai chhuah ngei tumin kan theihtawp kan chhuah dawn a, a tawp ber nih hi chu kan tum bik lo," tiin chak ngei an tum thu a sawi.

Final lut chiang sa Khatla

Zanin dar 8:00-ah khelh hmabak pathum la nei chunga final lut chiang tawh Khatla TBL leh Mission Veng Vikings an inkhel dawn a, inkhel hmuhnawm beisei ila, kan beisei sual lo ang.

Khatla TBL in final an luh chian tawh avang­in players chhawr rim loh te'n an khelin a rinawm a, Vikings tan hei hi chance ṭha a ni thei. Mission Veng Vikings in an game hnuhnung berah Tuikual South an hneh loh avangin an tan final kawngka hawng zau tur chuan zaninah an tan chak loh a thiang tawh lo.

Khatla TBL Asst. Coach Vanlalnunsanga chuan, "Final lut chiang tawh kan nih vang maiin kan inthlahdah dawn lo a, kan game hmabak zawng zawnga chak chhoh vek hi kan tum chu a ni. Pressure nei lo a inkhel tur kan nih vangin nuam ti takin kan khel ang," tiin Vikings an tum tur chu in enkual nan hman an tum thu a sawi.