PSG chakna Ibra hat-trick

Paris Saint Germain in French Cup final lut turin Nilaini zan khan St Etienne chu 4-1 in an sawp a, France club zinga season khata competition pathum nomawi chawi vek hmasa ber nih an tumna chu an chhawm nung zel.

Parc des Princes-a inkhelah hian mual neitu PSG tan Swedish striker Ibrahimovic chuan hat-trick a siam a, Ezequiel Lavezzi chuan goal khat a khung ve bawk.

Ibra hian inkhel ṭan aṭanga minute 21 na lekah penalty aṭangin PSG goal hmahruai a khung nghal a, mikhual team St.Etienne tan Romain Hamouma chuan minute li hnu lekah a rawn sut nghal.

Second half-ah PSG in Lavezzi goal hmangin hma an hruai leh a, minute 81 na leh 90 naah Ibrahimovic chuan rawn khung ve lehin a team chu hnehna a chanpui ta a ni.

PSG hi tun season-a in elna an telna zawng zawnga champion vek thei dinhmunah an ding mek. Ligue 1-ah hmahruaitu ni mekin French Cup leh League Cup-ah final an lut tawh a, Barcelona nen Champions League Quarter final-ah an inhmachhawn bawk ang.