Real Madrid chakna Ronaldo

Cristiano Ronaldo-a'n Real Madrid tan goal 300 a khung tlin zanah Rayo Vallecano 2-0 in an hneh a, hmahruaitu Barcelona an um chhunzawm zel.

Nilaini zan La Liga inkhelah hian Real-in Iker Casillas chet ṭhat zarah first half-ah goal an chhuah lo. Second half-ah Real Madrid ṭha zawk an in lar a, Gareth Bale-a ball tauh ṭha tak chu goal sirah chiah chiah a kal a, referee-in penalty ni ngei tura ngaiah Ronaldo chu penalty a pe lo.

Kum 30-a upa Ronaldo hian kartawpa Real-in Granada 9-1 a an hneh ṭumin a vawi khatna atan goal nga a khung a, Nilaini zanah erawh goal an khung lawk thei lo. Minute 68-naah Ronaldo hian Real hmahruaina goal a tauh lut ta nge nge a, minute nga hnuah James Rodriguez-a'n a hlai goal leh bawk.

Goal khungtu Ronaldo leh James bakah Toni Kroos te'n yellow card an hmuh avangin kartawpa Eibar an hmachhawn hunah an tel ve thei lo ang.

Kum 2009-a Manchester United aṭanga pound maktaduai 80-a Real Madrid zawmtu Ronaldo hian Spanish club tana match 288 a khelhah goal 300 a khung tling ta a. Portuguese captain tluk loh chu Real legend Raul (323) leh Alfredo Di Stefano (307) te chiah an ni. Anni hian goal 300 khung tling turin match 741 leh 396 an mamawh thung.

Real Madrid boss Carlo Ancelotti chuan, "Ronaldo khan penalty a hlawhchhuak ngei tur a ni. Referee hnehah khan penalty a pe lo chu mak ka tih thu ka hrilh. Chutihrualin second half kan khelh ṭhat avangin ka lawm a, player che vel hmuh a nuam a ni," tiin inkhel chungchang a sawi.

Real goal hnihna khungtu James Rodriguez chuan, "First half-ah khan Rayo Vallecano kha an khel ṭha a, an chau tih kan hriat avangin second half-ah kha chuan goal khung kan inbeisei a, kan rin ang ngeiin goal kan khung bawk. A chang hi chuan harsa taka chak chang a awm ṭhin," a ti.

Inkhel Results

Atletico Madrid 2 - 0 Real Sociedad

Levante 1 - 2 Sevilla

Eibar 1 - 0 Málaga

Deportivo 1- 1 Córdoba

Barcelona 4 - 0 Almería

Granada 1 - 1 Celta de Vigo

Rayo Vallecano 0 - 2 Real Madrid