Chelh rual loh Lionel Messi

Barcelona-in Nilaini zan khan Nou Camp-ah Almeria 4-0 in an sawp a, league-ah a zawnin vawi kua an chak ta.

Catalan club tan Lionel Messi-a'n darkar chanve pelh hretah goal hmahruai a khung a, second half-ah Luis Suarez-a'n goal hnih a khung bakah Marc Batra-a'n goal khat a khung ve bawk.

Argentine forward Messi-a'n tun season league-ah goal 33 a khung ta a, Real Madrid forward Cristiano Ronaldo goal liin a la pha lo.

Almeria hi Barca defender hlui Sergi hnuaia khel a ni a, Spanish defender hian Catalan club tan match 250 chuang a khel hman.

Luis Enrique enkawl Barca hian match hnuhnung 21-ah vawi 20 an chak a, anmahni hnaih bertu Real Madrid aiin point liin an sang zawk.

Goal li zet khung mah se Barca manager a lawm lo, Enrique chuan, "Inkhel kan thunun a, kan chakna kawngah harsatna kan nei lo. Amaherawhchu kan game a rang tawk lo a, goal chance kan neih tam loh phah a, kan hmasawnna lai tur a ni," a ti.

Barca boss chuan Neymar khelh loh chhan chu hahdam tir an duh vang niin a sawi bawk.

Catalan club hian Champions League quarterfinal-ah Paris St Germain an hmachhawn dawn a, Athletic Bilbao nen Copa del Rey final an khel bawk ang. Barcelona hi tun dinhmunah treble champion thei dinhmunah an la ding.