Ranking-ah Saina pahnihna

Nimin khan BWF World Ran­king thar ber tihchhuah a ni a, Indian star Saina Nehwal chu pakhatna aṭangin pahnihnaah a tla thla.

Ranking-a Saina pakhatna nih chhung rei lo mah se kum li chhunga Chinese ni lo ranking-a number 1 hauh theih awmchhun a ni. Nilaini khan Saina hian 2015 Malaysia Open Badminton Superseries, Kuala Lumpur-ah Chinese Li Xuerui a hneh lo a; Olympic champion Li Xuerui hi hmeichhe number 1 thar a ni.

Nehwal chuan, "A rei zawng a pawimawh lo. Number one chu number one a ni. Ka awm chhung rei lo mah se number one ka ni ve tawh a, chu chuan minti lawm hle. Chinese player-te hian talent an neih ṭhat avangin elpui an harsa a, world class player paruk vel ngawt an nei a, chutichung chuan number 1 nih leh ngei erawh ka tum hle," tiin a sawi.

Mipa-ah Chinese player Chen Long chu ranking-ah pakhat­na a ni a, Indian player Kidambi Srikanth chu palinaah a awm.