I League Lajong-in Mohun Bagan an dal

Mohun Bagan-in Nilaini zan khan I League-a hmahruai belhchhahna hun ṭha an bawhpelh a, Barasat District Sports Stadium-ah mikhual Shillong Lajong nen goal awm loin an inhnehtawk.

Lajong tan Reitlang FC leh Chanmari FC tana khel tawh Joseph Lalfakzuala chu starting eleven-ah a awm a, ISL-a Northeast United tana inlan Zodingliana Ralte hmuh tur a awm bawk.

Mohun Bagan-in goal beiseiin minute 78-naah Balwant Singh aiah Jeje Lalpekhlua an luh tir a, amaherawhchu I Super League-a Indian zinga goal khung tam ber Hnahthial tlangval hian goal a khung lo a, 0-0 in an inhnehtawk.

Inkhel dangah East Bengal-in Dudu Omagbemi goal hnih leh Ranti Martins penalty hmangin Bharat FC 3-0 in an sawp a, East Bengal tan Lalrindika Ralte leh Robert Lalthlamuana te an inlan.

Mohun Bagan hian point 25 hmu tawhin hmahruaitu an ni chhunzawm zel a, anmahni aia match hniha khel tam Bengaluru aiin point thumin an sang zawk. East Bengal erawh point 16 hmuin panganaah an awm thung.

Team Dinhmun

# Team Pld GD Pts

1 Mohun Bagan 11 12 25

2 Bengaluru 13 7 22

3 Royal Wahingdoh 13 2 22

4 Pune 12 5 20

5 East Bengal 11 5 16

6 Salgaocar 12 -3 14

7 Mumbai 12 -6 13

8 Shillong Lajong 11 0 11

9 Bharat FC 11 -4 11

10 Dempo 11 -5 10

11 Sporting Goa 13 -13 7