Bayern leh Dortmund inhmachhawn dawn

Bayern Munich chuan Bayer Leverkusen hnehin German Cup semi-final an lut a, semi-final-ah Borussia Dortmund nen an inhmachhawn ang. Team pahnihte hi nikum khan final-ah an lo inhmachhawn tawh a, Bayern an chak zawk.

Bayern leh Leverkusen te inkhelah minute 120 chhung goal a luh loh avangin penalty hmanga chakzawk zawn a ni a, hetah hian Bayern vannei zawkin 5-3 in an chak ta a ni.

Kum dang ang bawkin tun season-ah Bayern hi an khel ṭha tluang leh hle a, tundinhmunah no­mawi pathum chawi thei dinhmunah an ding mek. Champions League quarter-final an lut tawh a, German Cup semi-final an luh tawh bakah Bundesliga-ah hma an hruai mek a ni.

Semi-final lehlamah Bielefeld leh Wolfsburg an inhmachhawn thung ang a, semi-final hi April 28 leh 29-ah khelh a ni ang.

Bayern tana penalty pet goal hmasa ber tu Thomas Muller chuan, "Penalty aṭanga chak zawk zawn hi chu vanneih leh vanduai inkar a ni tawh ṭhin. Zaninah khan kan khingpui te kha an khel ṭha em em a, atawpah kan vannei hlauh a ni," tiin a sawi.