NECS CUP 2015 Final A hun a thleng ta, Armed Veng Vs Ramhlun South

February 23 aṭanga khelh ṭan team 132 zet telna, Aizawl DFA leh TṬ Royte Group buatsaih NECS CUP 2015 Inter village Football Tournament chu a hmawr an bawk dawn ta. Vawiin chawhnu dar 2:00 hian Lammualah Ramhlun South leh Armed veng ten final an khel ang.

2014 Final Rematch

Ramhlun South hian NECS CUP tournament-ah hneh loh an la tawng lo. Vawiin hnih an champion tawh a, a vawi thum naah final an lut leh bawk. A zawna vawi thum champion an tum ruh hle.

Armed Veng pawh hi tualchhung fooball-ah ngaihnep thei a ni lo. Anni hi Central YMA football-a record nei ṭha ber an ni a, amaherawhchu Village Council/Local Council hmanga football inelnaah an la champion ngai lo. NECS Cup champion hi an duhaisam ti kimtu tur a ni.

Inkhel Turte

Armed veng lamah hian player inhliam leh harsatna nei an nei lo a, coach-in player duhthlan tur a ngah dawn. Tlar hmaah Lalfakzuala an nei a, a kawppui turin player India junior tana khel tawh Vanlalduatsanga an nei bawk. Tlar hnungah innghahna tham Lalnghinglova an neih bawk avangin kumin chu phuba lak theih ngei an inbeisei hle.

Ramhlun South lam hian semifinal a an chhawr theih loh pahnih Zico Zoremsanga leh Vanlalthlamuana an chhawr theih tawh an beisei a, mid­field-ah player tawnhriat ngah Samson Ramengmawia leh Samuel Lalhruaitluanga an neih bawk avangin team hlauhawm tak an ni a, vawi thum an cham­pion a nih pawhin a mak lo ang.

Eng nge an sawi?

Ramhlun South coach HC Zarzoliana chuan, "Local Coun­cil leh mipuiten min ṭawiawm ṭhat ṭhin em avanga tun hun hi thleng thei kan ni. Armed Veng hi team ṭha tak ni mah se kan huphurh hran lo a, ka player-te an fit-in an dam kim bawk a, kan champion leh theih ngei ka beisei," tiin a sawi.

Armed Veng coach Lalram­chhuana Ralte chuan, "Hun kal tawh chu hun kal tawh a ni a, a liam tawh. Tunah chuan team thar leh ngaihtuahna thar kan nih tawh avangin kuminah chuan kan chak ve tawh ngei ka beisei a ni. Veng mipui leh Local Council-te'n min ṭawiawm ṭha em em a, anni zara tun hun thleng thei hi kan ni," tiin Vanglaini palai a hrilh.

Mipui ṭhutna tur

Ramhlun South ṭantute K. Kawla Stand leh S. Mal­sawmtluanga Stand-ah ṭhut tur a ni a, Armed Veng ṭantute Zomuanthanga Stand leh Zohminga Zote Stand-ah ṭhut tur a ni ang. Club pahnih hruaituten an fan-te chu rilru fim tak pu a inkhel en turin an ngen a ni.

Final Kalkawng
Armed Veng
Last 16
2-0 Durtlang
Quarterfinal
2-0 ITI
Semifinal
2-0 Bethlehem VT
Ramhlun South
Last 16
1-0 Kanan
Quarterfinal
5-3 Dinthar
Semifinal
5-1 Armed Veng S