Bethlehem Vengthlang daltu Armed Veng

2015 NECS Cup Inter Village Football Tournament semi final hnuhnung zawk chu Nilaini zan khan khelh zawh a ni ta a, Armed Veng chuan Bethlehem Vengthlang 1-0 a hnehin a vawi hnih nan final an lut.

Team pahnihin player ṭha leh hlauhawm an kawl ve ve avangin an fimkhur tawn a, an innawr nghal buan buan lem lo. Midfield-ah roreltu nih an inchuh a, chungnung zawk an awm thei mai lo. An indang chat tawn a, goal khungna hun ṭha an insiam sak lo ve ve.

Second half-ah pawh an inhnehtawk leh hle a, goal chance kan hmu tam lo. Armed Veng lamin corner an hmu a, corner aṭanga ball lokal chu Bethlehem Vengthlang defender ten an clear mai loh avangin minute 58-naah B. Zoramthanga chuan Armed tan goal hmahruai a khung. Bethlehem Vengthlangin tlawm an tum bik lo, sut ngei tumin an nawr let a, mah se Lalnghinglova kaihruai Armed Veng tlar hnung a nghing lo.

Eng nge an sawi?

Armed Veng coach Lalramchhuana Ralte chuan, "Kan chak chhan ber chu kan player te thawhrimna, tih hram hramna leh tawrhchhelna vang a ni. Ṭha taka kan inkhelh theih nan hian Pathian kan au ṭhin a chun chu min chhang a,a kan vanneih phah ta a ni," tiin a sawi.

Bethlehem Vengthlang manager Benjamin Lalhriatpuia chuan, "Kan ruahman angin kan khel thei lo kha a pawi, ground ball khelh kan tum a mah se kan ṭum fuh loh zan a nih vang a niang kan khel thei tlat lo. Tun hi kan tawpna tur a ni lo a, kan lo let leh ngai ang. Kan coach Lalsangzuala Hmar kaihhruaina zarah kan player ten hma an sawnin zuk leh hmuam chungchangah pawh an fimhlim sawt hle," tiin Vanglaini palai a hrilh.