I League Second Division Mohammedan SC Vs Chanmari FC; Aizawl FC Vs PIFA

Chanmari FC-in I League Second Division-ah Kenkre FC, Hindustan FC leh United SC sawpin bul an ṭan a, amaherawhchu match hnuhnung bera Lonestar Kashmir an hneh loh avangin hmahruaitu aṭangin pathumnaah an tla thla a. Vawiina Kolkata club ṭha Mohammedan SC an ngam loh chuan an chan tur chu palina a ni.

Vawiin tlai dar 3:15 hian Chanmari FC-in Kanchenjunga Stadium-ah Mohammedan SC an khelh pui ang a, zing dar 9:30 hian SSB Ranidanga Ground-ah hmahruaitu Aizawl FC leh PIFA an inkhel bawk ang.

Chanmari FC-in player pawimawh keeper Lalawmpuia leh defender Lalruatthara te inhliam vangin an la chhawr thei dawn lo a, card vangin Laldingngheta a inlan thei dawn lo bawk.

Chanmari hian match tinah goal an la chhuah vek a, player ṭha pahnih tel lo hian Lonestar Kashmir lakah goal hnih an chhuah. Mohammedan hian Nigerian forward goal thum khung tawh Somide Adelaja leh Daniel Bedemi bakah Bengali striker ṭha Ashim Biswas an nei bawk. MPL2 champion dinhmun hi a him lo hle.

Chanmari manager H. Vanlalthlanga chuan, "Referee nena ṭangkawpin team ṭha ber Lonestar Kashmir-in min hneh hram a, Mohammedan hmaa kan zamna chhan tur a awm lo. A zawnin vawi hnih kan chak lo thei tih chu kan hria a, mah se theihtawp kan chhuah ang," a ti.

Inelna neih meka chak vek awmchhun Aizawl FC-in point khat chiah la hlawhchhuak PIFA an khel dawn a, player inhliam leh hrem an neih loh avangin MPL3 champion hi chak tura ngaih zawk an ni.

Amaherawhchu an khelhna tur SSB Ranidanga Ground hi ground chhe zawk a ni a, ground ball-a khel ṭhin Aizawl FC-in khelmual chhe zawka an khelhna hmasak ber turah hian harsatna tawk thei an ni.

Aizawl FC coach K. Malsawmkima chuan, "Awlsam a awm lo. PIFA pawh hi hneh chiang sa kan ti thei lo. Kan chak zel hi a lawmawm a, amaherawhchu Siliguri hi tun hnaiah a lum lehzual a, kan game-ah ngawng a neih loh ngei ka beisei," tiin a sawi.