Aizawla ISL khelh kan duh - NE United CEO

India rama football inelna sang ber Indian Super League chu zanin dar 7:30 hian khelh ṭan a ni dawn a, season liam ta finalist Mohun Bagan leh Mumbai City te an inkhel nghal dawn. Nimin khan India hmarchhak aṭanga ISL club awmchhun NorthEast United chuan season thar khuh hawn nan Indira Gandhi Athletic Stadium, Guwahati-ah Media Day an hmang a, club CEO Mundar Tumhane chuan Aizawla ISL match khelh an duh thu Vanglaini a hrilh.

NE United Media Day-ah hian India hmarchhak state hrang hrang aṭangin journalist an kal khawm a, ISL club hian club kalphung leh hmachhawpte puanzarna hun atan an hmang. Thuthar thehdarhtute hian Durand Cup champion zo hlim NE United training session an chhim bawk.

Aizawlah ISL?

Mizoram chhung ngeiah I League khelh a ni tawh a, Mizo club Aizawl FC an champion. AFC champion hun lai hian I League hi India rama league sang ber a ni a, tunah erawh ISL chu India rama league sang ber a ni tawh thung.

Aizawla ISL khel tur chuan Mizo club-in ISL an khelh an ngai a, Aizawl FC-in I League nomawi an champion chuan ISL khelh theihna kawng a inhawng ang. Mahse, ISL khel tur chuan 'natural grass' neih a ṭul a, Mizoramah ISL khelh theihna tur stadium a awm lo.

NE United CEO Mundar Tumhane chuan, "Aizawla match ṭhenkhat khelh theih chu kan chak alawm. Mahse, Aizawlah ISL khelh theihna tur stadium a awm lo. Theih chu ni se, Aizawl chauh ni loin Shillong leh Imphal-ah te pawh khelh kan duh," tiin Vanglaini a hrilh.

Mundar chuan sawi chhunzawmin, "Aizawl chuan artificial turf chu in mamawh a, MPL leh match ṭhahnem tak khelh nan a ṭha. Chutihrualin Mizoram football-a hma a sawn zel nan natural grass awmna stadium ṭha chu in mamawh. ISL chauh ni loin international match thlengin inthleng thei ang. Football lama mi bik Lalnghinglova Hmar in kawl a, Sports Minister a nih tawh bawk avangin hma an lak ngei ka beisei a, a bulah pawh ka la ngen ang," a ti.

Shillong-ah ISL

NE United hian Indira Gandhi Athletic Stadium, Guwahati chu home match khelh nan an hmang a, ṭantu neih ṭhat nan hmun danga khelh an hnial lo. Polo Ground tia hriat lar Jawaharlal Nehru Stadium, Shillong-ah natural grass an dah thar a, Durand Cup group stage khelh nan an hmang.

NE United CEO Mundar chuan, "Shillong-ah ISL khelh ngei kan tum a, hma kan la mek. Ruahman dan chuan nakkum January-ah chuan kan khelh theih kan beisei a, a hlawhtling ta lo a nih pawhin season tharah chuan kan khel thei hrim hrim ang," tiin a sawi.

Polo Ground hian Durand Cup group match bakah quarterfinal leh semifinal an thleng a, NE United hian Shillong-ah semifinal khelin mualneitu Shillong Lajong chu 3-0 in an henh a, final-ah Mohun Bagan hnehin an champion zui bawk. NE United head coach Juan Pedro Benali chuan, "Shillong khelmual kha khelh a nuam takzet, India rama khelmual ṭha ber zinga mi a ni," tiin a sawi.

Shillong-in India hmarchhak aṭanga I League club hmasa ber Shillong Lajong an nei a, Aizawlin India hmarchhak aṭanga I League champion hmasa ber leh nomawi chawi tawh awmchhun Aizawl FC an kawl thung. Aizawl tan pawh natural grass awmna stadium ṭha tak neih hi thil theih a ni.

Mizo leh NE United

NorthEast United-ah hian Robert Lalthlamuana, Lalrindika Ralte, Lalengmawia (Apuia), Lalṭhathanga Khawlhring, Zodingliana Ralte, Rochharzela, R. Laldanmawia, Lalrempuia Fanai, Joe Zoherliana, Emmanuel Lalchhanchhuaha, Lalkhawpuimawia leh William Lalnunfela te an lo khel tawh a, tun ṭumah erawh senior team-ah Fredy Chawngthansanga chiah a awm.

Chutihrualin NE United leh Mizoramin thohona ṭha tak an nei a, kumin I Day Football-ah pawh NE United hian reserve team an rawn tir a ni. Club CEO Mundar chuan, "MPL club hmaa kan reserve player-te dinhmun fiahna theih hun ṭha MFA-in min siamsak avangin an lawm a, I Day Football kan khel kha kan hlawkpui viauah kan ngai. Mizoten football-ah talent an nei tih a lang chiang hle," tiin a sawi.

I Day Football-ah hian NE United hian reserve team an rawn tir a; Aizawl FC, Mizoram Police, Bethlehem leh Chawnpui FC te nen group khatah awmin match li an khelhah an chak lo vek. Chutihrualin NE United senior team erawhin ISL atan inbuatsaihna nei ṭha a, Durand Cup an champion. Highlanders hian September 16, Thawhṭanni zan hian ISL kai thar Mohammedan SC nen match hmasa ber an khel ang.