Chhun dar 12:00-ah inkhel pawimawh: Chawnpui hmaah Bethlehem

LZ Juice MPL11-ah vawiin chhun dar 12:00 hian Chawnpui FC leh FC Bethlehem te an inkhel dawn a, table hnuai pahnih inkhel tur an nih avangin inkhel hi a pawimawh hle. Bethlehem tan table mawngphah aṭanga talchhuah theihna hun ṭha a nih laiin Chawnpui tan semifinal beiseina chhit nunna remchang a ni thei thung.

Chawnpui hian Bethlehem hi an inkhelh hmasak zawk ṭumah 2-1 in an hneh tawh a, MPL11-ah goal differene aia head to head dah pawimawh zawk a nih avangin MPL9 champion tan relegate loh tum chuan point khat hlawhchhuah ringawt pawh a hlu khawp ang.

Mahse, coach thar Lalrindika Hmar hi point khata lungawi tur a ni lo. MPL-a coach tawnhriat nei ṭha zinga mi Rindika hian MPL nomawi a la chawi lo a, kuminah nomawi a chawi thei lo a nih pawhin semifinal thlen phak ngei a duh dawn.

Chumi tur chuan Chawnpui FC hruaituten Rindika hi an thlawp ṭha a; Tea Chinzah, Silvana Lalruatkima leh Jessie Lalmawizuala te an laksak. Hei vang hian Chawnpui hi table hnuai lam team anga en chi an ni tawh lo a, semifinal khel thei turin player ṭha an nei tawh.

Season bul ṭan ṭha lo Bethelhem pawh table mawngphaha awm ni mah se an insiamṭha tawh hle Coach Lalhriatpuia Sailo pui turin Lalthantluanga (T2-a) an lalut a, T2-a season liam taa Chawnpui FC-a Rindika puitu a ni. Vawiin inkhel turah Bethlehem tan T2-a tawnhriat hi pawimawh ang.

Bethlehem hian transfer tawp hma hretin Lalnunzira, Daniel Lalliana leh Samuel Lawmsiamkima te an lalut bawk a, player tharte hi Police an sawp theihna chhan an ni. Hriatpuia Sailo hote hian an match hnuhnung berah SYS FC hneh lo mah se Chawnpui hneh turin theihna an nei a, an hmalam hun hril thei tur a nih avangin Rindika hote hneh ngei hi an tum dawn a ni.