Mizoramin ISL-ah player 33 thawh

India rama football league sang ber Indian Super League chu zanin dar 7:30 hian khelh ṭan a ni dawn a, season hmasa final rematch kan hmu nghal dawn - Mohun Bagan chuan Mumbai City an mikhual dawn a, inkhel en châkawm a tling.

Tun season ISL-ah hian Mizoram player 33 ngawtin season bul an ṭan dawn a, ISL-a Mizoram player an tam ber ṭum record a ni. ISL club 12 zingah Punjab FC chu Mizoram player kawl lo awmchhun an ni a, a bak club 11-in Mizoram player an kawl vek.

ISL kai thar Mohammedan SC chu Mizoram player kawl hnem ber an ni a, player paruk ngawt an kawl - season hmasaa Mizoram player pakua kawltu Odisha FC leh Hyderabad FC-in an dawt a, anni hian player panga an kawl thung.

ISL-a Mizoram player-te hlawh zat belhkhawm hi season khatah nuai 2000 chuang a tling a, football thiam vanga kan player-ten Mizorama an rawn luhpui hi tam tham tak a ni.

Hmanah chuan...

Kum 2014 khan ISL hi khelh ṭan niin, Mizoram aṭangin player parukin inelna an hmachhawn. Hetihlai hian India rama league sang ber a la ni lo a, I League chawlh laia khelh ṭhin niin, club pariat chiahin inelna hi an hmachhawn bawk.

ISL season hmasa bera Mizoram player inlante hi Chennaiyin tan Jeje Lalpekhlua, Delhi Dynamos-ah S. Malsawmtluanga & Robert Lalthlamuana, Mumbai City-ah Lalrindika Ralte & Lalrinfela, NorthEast United-ah Zodingliana Tochhawng te an ni.

Hetihlaia ISL khel tawh Zingah Adinga chu tun thlenga professional football la khel awmchhun a ni a, Adinga hian season hmasa khan I League khelin, Mohammedan SC chu a champion pui a, tun season-ah ISL a la khel dawn!

Adinga hian ISL-ah NorthEast United, Delhi Dynamos leh Pune City tan a lo khel tawh a, FC Goa Reserve team lamah hun lo hmang tawhin, Shillong Lajong, NEROCA, Gokulam Kerala, Aizawl FC leh Mohammedan SC tan I League a lo khel tawh bawk.

An pung zel

ISL-in hma a sawn zel a, tunah phei chuan India rama league sang ber a ni tawh - ISL-in hma a sawn rualin Mizoram player inlan pawh an pung ve zel a, 2014-a player paruk chiah neitu Mizoram khan player 33 zet kan thawh ta.

Kum 2015 khan ISL-ah hian Mizoram player 10 awmin, a kum hmasa nena khaikhinin, player paliin an pung a, 2016-ah 14, 2017-ah 16, 2018-ah 20, 2019-ah 16, 2020-ah 30, 2021-ah 27, 2022-ah 26, 2023-ah 27 niin, tun season hmaa an tam ber kum, kum 2020-a player zat chu player pathumin tun season-ah khum a ni.

Hetihrual hian player zat kan tarlan hi season ṭantira Mizoram player zat zel a ni a, season a zawh meuh chuan a danglam ve leh ṭhin tih hriat tel a ṭha. Season laklawhah thlasik transfer hman ṭhin a ni a, player ṭhenkhat I League lamah chhuakin, a lut thar an awm ve leh ṭhin bawk.

Hriat tel atana ṭha chu ISL reserve team-ah Mizoram player engemaw zat an la awm tih hi a ni a, club-in ṭul a tih dan a zirin reserve team-a player-te hian season laklawhah club tan match an khel ve thei.