Hneh loh nei lo Chanmari FC

I League 3 group stage chu khelh zawh a ni ta a, Chanmari FC-in tlawm nei loin playoff an lut - Mizoram Premier League table chung ber luah mektu hian an match tawp berah Hindustan Aeronautics Limited SC chu 2-1 in an hneh.

Chanmari FC hian match li an khelhah hnehna an chang vek a, ngam loh tawng loin playoff an lut - HAL SC lakah hian Vincent Lalduhawma leh MS Dawngliana ten goal khat ve ve an khung a, HAL tana Ajith R goal khungin awmzia a nei phak lo.

HAL tan playoff lut tawh Chanmari lakah draw result a tawk a, mahse, an tlawm miau avangin playoff an beiseina a thamral - Chanmari bakah hian Mumbai club MYJ-GMSC te chu playoff khel tur hian an tling.

Chak tum Chanmari

Nilaini zana Chanmari inlan hmain GMSC chuan 5-1 in RKM Football Academy an sawp a, point sarih an hmu - HAL SC pawhin GMSC ang thoin point sarih an nei a, Mumbai club hian HAL nena an inthlauhna chingfel turin an mamawh zat chiah goal an khung bawk.

A tawi zawnga sawi chuan GMSC tan playoff khel turin Chanmariin HAL an hnehsak a tawk a, mahse, Mizo club-in playoff an luh chian tawh avangin hlauhthawnna an nei - Chanmari erawh playoff lut tawh rilru puin an khel lo a, chak ngei an tum.

Coach Lalsangzuala Hmar-in Joseph Lalvenhima, Vincent leh MS Dawngliana te a luhtir nghal vek avangin, Mizo club hian goal khung ngei an tum tih a chiang a, chak vek chunga playoff luh an tum.

Chanmari an hmuhnawm

Minute 31-naah Chanmari hian goal hmahruai an khung a, KC Malsawmsanga corner aṭanga ball kal chu Lalhmangaihsanga'n goal-ah shot-in, hei hi Vincent chuan lo khawih perin, goal-ah a lut.

HAL lamin nawr let tum viau mah se, Chanmari lakah an che hleithei lo a, minute 77-naah Dawngtea a inlar - Sawmsanga ball cross luh chu Moses Lalrinzuala'n lo khawih per mah se, Dawngtea hian a per lehlam chu a lo tauh goal a, 2-0 a ni.

Hun tawp nan minute li a la awm tihin Ajith R chuan HAL tan si phurh sut ṭhen mah se, awmzia a nei phak lo - CFC vanneih zan ni se, goal tam zawk khung thei an ni. Captain Rinchhana, Moses, Dawngtea leh Vincent an chance neih duhawm goal-ah an chantir lo vek.