ISL-ah Mizo captain

Indian Super League-ah Mizoram player-ten captain armband an lo hreng tawh ṭhin a, Jeje Lalpekhlua (Chennaiyin), Robert Lalthlamuana (NorthEast United) leh Lalengmawia Ralte (NorthEast United) ten captain armband an lo hreng tawh a, Apuia phei chu kum 20 leh ni 44 mi niin ISL-a captain naupang ber record a lo chelh tawh.

Season tluana captain dinhmun lo chelh tawh erawh Apuia chiah a ni a, tun season-ah Mumbai City chuan captain turin Lallianzuala Chhangte an ruat bawk. AIFF Player of the Year a zawna ni thei Lianzuala tan season chhinchhiahtlak bik a ni dawn.

Lianzuala chuan, "Captain ka nih vangin pressure ka nei hran lo a, a hmaa ka lo tih fo tawh ṭhin angin, Pathian ropuina tur leh team tan theihtawp ka chhuah chhunzawm zel ang," tiin Vanglaini a hrilh a, Mizo tlangval hi a zam lo.

India international Lianzuala chuan season lo awm tur thlirlawkin, "Pathian zarah champion leh ngei tumin theihtawp kan chhuah ang. Mahse, game tin mai hi a pawimawh a, tuna pawimawh ber chu kan game hmasa bera chak ngei tuma beih a ni," a ti.

LZa hian season hmasa khan ISL-ah match 25 khela goal 10 khungin, assist vawi ruk a nei a, Indian player zingah ani aia goal khung hnem an awm lo. Kum 2022-23 season khan Best Player a lo ni tawh a, Indian player zingah Sunil Chhetri tih loha ISL player ṭha bera thlan awmchhun a lo ni tawh.