Police laka phuba lak tum Aizawl FC

I League club Aizawl FC-in I Day Football final-ah Mizoram Police an hneh lo a, nomawi an chan. Vawiin tlai dar 3:00 hian RG Stadium-ah Victor Lalbiakmawia hoten MPL leh I Day Football champion lai Police an hmachhawn dawn a, Aizawl FC-in phuba lak an tum ang.

Hliam tuar AFC

Aizawl FC-in LZ Juice MPL11-ah hneh loh an la tawng miah lo a, mahse I League club hian hliam an tuar mek. I Day Football final-a an mualpho vanga an hliam tawrh hmasak pawh a la reh hmain Chanmari FC B Team nen an inhnehtawk a, hliam chi hnih an tuar mek.

Chanmari FC hian I League 3-a match hmasa berah September 3, Thawhlehni zanah an khel a, darkar 24 pawh hahchawl hman loin a tukah Aizawl FC an hmachhawn lehnghal a, I League club nen 1-1 in an inhnehtawk. Victor-a hoten Chanmari FC hmachhawn leh hun an innghakhlel a, mahse tuna a lan dan chuan MPL11 final an thlen ve ve chauhin an inhmachhawn thei dawn niin a lang.

Chuvangin tun dinhmunah Aizawl FC-in Chanmari FC lakah an rilru natna dah ṭhain Police lakah an insawrbing a ṭul a, vawiin tlai inkhel tur hi phuba lakna remchang a ni.

AFC tan a pawimawh

MPL11-ah league champion a awm dawn a, Aizawl FC tan Chanmari FC chunga awm turin chetsual a thiang lo. Covid-19 hnua nomawi la chawi leh lo, Aizawl FC tan nomawi chhuhsaktu Police an hneh let hi a pawimawh takzet.

AFC-in MPL11-a Police an hmachhawn hmasak ṭumin 4-1 zetin an sawp a, I Day Football group stage-ah 2-0 a hneh lehin nomawi chawi an inbeisei hle. Mahse, August 15, Ningani zanah thilmak a thleng. Ruahsur hnuaiah Police-in Aizawl FC 4-2 in an sawp a, Victor Lalbiakmawia leh thawhpuite tawrhna hi a taka tawng lo chuan an hrethiam pha lo ang.

Victor-a enkawl Aizawl FC hi I Day Foobtall 2023 final-ah Chhinga Veng lakah an vanduai tawh a, kum zawnin final-ah an vanduai. Police an hneh loh ṭum hian Aizawl FC technical area a ngui a, a reh ṭhap a, player leh coaching staff rilru natna kha thua sawifiah hi a ni lo.

Hei vang hian, Aizawl FC tan point vang chauh ni loin an hming hliauna nuai reh nan Police an hneh let hi a pawimawh takzet a ni.

BD-a tan hun ṭha

Tun season-a tualchhung football-a mit la bera sawi theih chu Lalbiakdika a ni a, Champhai Zotlang tlangval hi MPL11 leh I Day Football-ah a langsar hle. BD-a hian MPL11-a Police an sawp ṭumin hattrick a siam a, mahse I Day Football final-a thil thleng erawh theihnghilh a duh ang.

BD-a hian I Day Football final-a Police an hmachhawn hmain goal sarih a khung tawh a, top scorer chauh ni loin best player thlengin a beisei thei ang. Mahse, final-ah I League club leh BD-a an chesual a, Champhai Zotlang tlangval hian hun tawp hma hretin Police winger Isaac Malsawmkima ball tel loa a petthluk vangin hnawhchhuah a ni.

Aizawl FC forward hian goal a khung tam ber vangin top scorer chawimawina a dawng a, best player chawimawina erawh a dawng pha ta lo a, final-a a chetsual angin match hnih an hrem ta zawk. BD-a chuan, "Ka insum hman lo a, ka tihsual liau liau a ni. Insawifiahna tur ka nei lo a, a thleng nawn tawh lo ang. Football zinkawnga min zirlai ṭha tak a ni," tiin Vanglaini hrilh.

MPL11-ah BD-a hian goal ruk a khung tawh a, club tana khelhpui C. Lalhriatpuia nen an khungzat a inang mek. Goal khung tam ber erawh Ramhlun Athletic forward Felix Lalruatsanga a ni a, BD-a hian I Day Football anga MPL11-a top scorer chawimawina dawn a tum a nih chuan Police laka goal khung hi a pawimawh ang.

Police dinhmun

Mizoram Police hian match kua aṭangin point 13 an hmu a, pathumna dinhmun luah mek mah se paruknaa awm Ramhlun Athletic aiin point thum chauhin an hmu tam zawk. MPL9-a semifinal thleng pha lo, Police tan champion zawn a theih rualin semifinal khelh phak loh pawh thil theih tak tur a ni.

I Day Football nomawi an chawi hnuaah Police hi FC Bethlehem lakah an mualpho a, table mawngphaha awm team hi vawi hnih hmachhawnin point khat chiah an hmu. Police hian result ṭha duhin Bethlehem laka an mualpho zawhah residential camp an buatsaih a, match hnuhnung berah Chawnpui 4-1 in an sawp.

Chutihrualin Police leh Chawnpui inkhel thlir chuan MPL10 champion team hi vanduai ve thei tih an hria ang. Police hi 2-1 a hma an hruai lain Silvana Lalruatkima'n penalty a hlah a, hei hi inkhel thlak danglamtu tiin a sawi theih. Aizawl FC lakah Police-in point thum hlawhchhuah an tum a nih chuan Chawnpui laka an khelh an ni loin I Day Football final-a an khelh dan anga an khelh nawn leh a ṭul dawn a ni.