Martin Odegaard a chawl rei dawn

Arsenal captain Martin Odegaard chu a kerek hliam vangin a chawl mek - a dinhmun hrechiangtu Norway team doctor Ola Sand chuan a rei lo berah chawlhkar thum tal a chawlh a ngai dawn niin a sawi.

Ola Sand-a sawi dan chuan Odegaard a ke vei lam hliamah hian ruh tliak erawh chu a awm lo. Mahse, Norway tana a inlanna lama a hliam hi thawk leh khata dam leh nghal mai thei a ni lo thung.

Norway leh Austria ten Nations League an khelh ṭumin Odegaard hi a inhliam, tunah chuan Arsenal hmunpui London lamah a let tawh a, a club Gunners hian a chungchang la puang chiah lo mah se training a la zawm lo.

Norway team doctor Sand-a chuan, "Tuna a kerek hliam ang hi chu chawlhkar thum an chawl ṭhin, chu aia rei an chawlh a ngaih chang pawh a awm, an dinhmun a zirin a la danglam leh thei," tiin a sawi.

Odegaard hi chawlhkar thum a chawl a nih chuan, tun kar tawpa Tottenham Hotspur nen North London Derby an khelh hunah a inlan thei dawn lo tihna a ni a, hei hi chânna nasa tak a ni thei ang.

Spurs bakah hian Italian club nen Champions League an khelh hunah a tel thei dawn lo, chumi hnua Premier League champion Manchester City an tlawh hunah pawh a la inlan thei dawn lo tihna a ni bawk.

North London Derby atan bik hian Declan Rice chu hrem vangin a inlan thei dawn lo a, nipui laia lakluh Mikel Merino chu hliam vangin a chawl mek bawk - midfield an insiamrem a ngai dawn hle.

Tun international break an neih laiin Gunners defender thar Riccardo Calafiori chu a hliam bawk. Italy international hi tun kar tawp atan a dinhmun a chiang lo, striker Gabriel Jesus erawh a khel bawr hliam dam tawhin a inkhel thei dawn hnai thung a ni.