Nuri Sahin a inringtawk

Borussia Dortmund coach Nuri Sahin hi kum 36 mi chauh a la ni a, team enkawltu zingah chuan a naupang pawl a ni - club lian a enkawlna hmasa ni mah se a inringtawk hle, zaninah pawh chak tumin an inlan ang.

Turkish-German manager Sahin chuan, "Player ka nih lai khan Dortmund tan hian ka lo khel tawh a, a tirah phei chuan reserve team tan ka khel. Chuvangin club hi ka hrechiang a, coach ka nih tirh aṭang khan ka hna turah ka chiang bawk.

"Tun hma lama kan khelh dan phung ṭhenkhat chhawm nun theih tawh loh a awm, ṭhenkhat erawh ṭangkai taka hman theih a la ni thung. Hna kan la thawk rei lo a, hmasawnna hmuh tur erawh a awm," tiin a sawi.

Dortmund hian tun season an league match hmasa pahnih aṭangin point li an hmu a, team 18 inel zingah palina an ni mek. Zanin dar 12:00 hian Signal Iduna Park-ah Heidenheim an mikhual ang.

German football inelna sang berah hian champion lai Bayer Leverkusen leh Bayern Munich te chu Inrinni zanah an inlan thung dawn a ni.