De Ligt chhantu Koeman

Netherlands manager Ronald Koeman chuan tun hnaia chesual fo mai Matthijs de Ligt a chhan a, Germany nen an inhnehtawk ṭuma a thlak chhan chu tunlai a boruak ṭha lo a tawn zual zel lohna tur a nih a beisei thu a sawi.

Kum 25 mi De Ligt-a ball pek sual vangin Deniz Undav chuan goal a khung phah, hei bakah hian a chinfel mai tura ngaih a tih theih loh avangin Joshua Kimmich-a'n a khung bawk. Bosnia and Herzegovina nen an inkhelh ṭum pawhin a tihsual avangin goal an chhuah.

Germany lakah ama tihsual vangin goal hnih an chhuah a, chawlhlawk laiin coach Koeman chuan De Ligt hi Brighton defender Jan Paul van Hecke hmangin a thlak a, inkhelh banah zawhna a dawn tam phah hle bawk.

Dutch team manager Koeman chuan, "Matthijs de Ligt kha hun ṭha ka pe leh a, mahse ka venhim a ngai rih ta zawk. A tihsual hlek kha min hrem nan an rawn hmang thei zel mai a, vanduai a kaltluang ve rih a ni.

"Match hmasa zawka chet fuh loh chungchang pawh kan sawidun tawh a, inrintawkna sang tak erawh a la nei. Chuvanga Germany hmachhawn leh pawh a ni," a ti a, a player chungah rinna a la nghat tih a sawi bawk.

Ajax tana ṭha taka a khelh hnuah De Ligt hian Juventus a zawm a, chumi hnuah Bayern Munich a zawm - Italian club leh Bundesliga club tan rinrawl a ni chiah lo, nipui bazar lai khan Manchester United a zawm a ni.