Pathianni zan dar 8:30-ah Manchester Derby

Manchester United-in an hmelma Manchester City hi a zawnin vawi nga an la hneh lo ngai lo, Pathianni zana United an chak loh chuan Louis van Gaal-a naute hian record duhawm lo tak an siam ang.

November thla khan City-in Etihad Stadium-ah Sergio Aguero goal hmangin United 1-0 in an hneh a, Pathianni zan dar 8:30 khian Old Trafford-ah an inhmachhawn leh dawn. Club pahnih inkarah point khat chauh a awm avangin tun ṭuma an inkhel tur hi table ti danglam thei tur a ni a, a pawimawh takzet.

Manuel Pellegrini team-te hi Premier League-ah a zawnin khualmualah vawi thum an chak lo tawh a, City hi September 2006-a Stuart Pearce-a hnuaia an mualpho hnuah City hi khualmualah a zawnin vawi li chak loh an la tawng leh lo. United ang thoin an chak loh chuan record duhawm lo takin a hmuak mek.

Rooney vs Kompany

Kum 2012 khan Manchester Derby khan Vincent Kompany chu hnawhchhuah a ni a, Wayne Rooney-a'n card pe anga a lo khawsak ve avangin sawisel a hlawh hle.

Chutihrualin Rooney hian derby-ah hun ropui a tawng tawh, 2011 khan nalh takin chakna goal a volley lut a, Kompany-a'n tih theih a nei lo.

2011/12 season-ah City leh United te champion tumin an inum a, April 2012-ah Kompany-a'n goal awmchhun a khung a, champion nomawi an chawi phah.

United defender hlui Gary Neville chuan, "Vincent Kompany hi a tla hniam takzet. A chunga thil thleng hi ka hrethiam lo," tiin tun hnaia City captain chet chhiat thu a sawi.

Rooney erawh tun hnaiah a cheṭha a, match hnuhnung pariatah goal ruk a khung. Premier League-ah Rooney-ah City lamah goal riat a khung tawh a, chung zinga goal thum chu Old Trafford-ah a ni.

Rojo vs Aguero

November thlaa an inkhelh hma khan Argentine defender Marcos Rojo chuan fiamthuin Sergio Aguero-a'n a hlauh tur thu a sawi. Etihad Stadium-ah an inkhel chiah a, Rojo inhliam vanga lakchhuah a nih aṭanga minute sarihah Aguero-a'n chakna goal a khung. Rojo lakchhuah a nih hma pawh hian Aguero hi a chungnung zawk.

Aguero hian league-ah United ṭum thum a hmachhawn tawh a, goal li a khung tawh.

Fellaini vs Silva

Spanish midfielder David Silva hi Old Trafford-a an inkhelh hnuhnun ber khan Jersey No. 10 role a tlin hle. Edin Dzeko hnungah awmin Silva kaihhruaina hnuaiah 3-0 in City an chak.

United-in beisei nei taka an thlir Marouane Fellaini a tlo hle, Belgian midfielder hi tunah chuan United player pawimawh a ni.

Engtin zel?

Manchester City manager Manuel Pellegrini chuan Thawhṭanni zana Crystal Palace an hneh loh zawhah a dinhmun a him thu a sawi. Amaherawhchu an hmelma United laka goal an chhuah tam vaih chuan Pellegrini hmalam hun hi a ngaihtuahawm ve khawp ang.

United boss Louis Van Gaal erawh league-ah a zawna vawi nga an chak tawh avangin a ṭawng pawr hle, tunhnaia an record avangin City an hlauh thu a sawi thung. Dutch manager thusawi hi City captain Vincent Kompany chuan chhangletin tuna an dinhmun hi United hmachhawn hun tak a nih thu a sawi. Manchester derby ti ngaihnawm zual turin tun hi ṭawngkama inbeih hunlai chu a ni.